نائب وزیراعظم اسحاق ڈار اور گورنر تبوک شہزادہ فہد بن سلطان کا رابطہ، پاک سعودی تعلقات مضبوط بنانے پر اتفاق

نائب وزیراعظم اور وزیر خارجہ اسحاق ڈار سے سعودی عرب کے شہر تبوک کے گورنر شہزادہ فہد بن سلطان نے ٹیلیفونک رابطہ کیا۔ اس موقع پر شہزادہ فہد بن سلطان نے نائب وزیراعظم کو نئے سال کی مبارکباد دی اور نیک خواہشات کا اظہار کیا۔

اسحاق ڈار نے نیک تمناؤں پر شکریہ ادا کرتے ہوئے شہزادہ فہد بن سلطان کی جانب سے تبوک کے دورے کی دعوت کو سراہا۔ ٹیلیفونک گفتگو کے دوران دونوں رہنماؤں نے باہمی دلچسپی کے مختلف شعبوں میں تعاون کو مزید فروغ دینے کی خواہش کا اظہار کیا۔

نائب وزیراعظم نے پاک سعودی تعلقات کے استحکام اور فروغ میں شہزادہ فہد بن سلطان کی ذاتی دلچسپی اور کردار کی تعریف کی، جبکہ دونوں رہنماؤں نے پاکستان اور سعودی عرب کے دیرینہ برادرانہ تعلقات کو مزید مضبوط بنانے کے عزم کا اعادہ کیا۔