وزیر اعلیٰ سندھ کی منظوری: جناح سندھ میڈیکل یونیورسٹی کے وائس چانسلر کی مدت میں توسیع

وزیر اعلیٰ سندھ مراد علی شاہ نے جناح سندھ میڈیکل یونیورسٹی کے وائس چانسلر، ڈاکٹر امجد سراج میمن، کو دوسری چار سالہ مدت کے لیے دوبارہ مقرر کرنے کی منظوری دے دی ہے۔

 یہ فیصلہ ڈاکٹر امجد سراج میمن کی شاندار کارکردگی کو مدنظر رکھتے ہوئے کیا گیا ہے۔

گزشتہ دو برس کے دوران وزیراعلیٰ سندھ نے کسی بھی وائس چانسلر کو دوسری مدت نہیں دی تھی، باوجود اس کے کہ اس حوالے سے سیاسی اور سفارتی دباؤ بھی موجود تھا۔ تاہم ڈاکٹر امجد سراج میمن کی خدمات کے پیش نظر انہوں نے اپنا فیصلہ تبدیل کیا۔

اس اقدام کے بعد جامعہ کراچی کے وائس چانسلر ڈاکٹر خالد عراقی کے لیے بھی دوسری چار سالہ مدت کا راستہ ہموار ہو گیا ہے، جن کی مدت 28 جولائی کو ختم ہوگی۔

 اسی طرح چیئرمین سندھ ایچ ای سی ڈاکٹر طارق رفیع کی مدت میں بھی توسیع کے امکانات پیدا ہو گئے ہیں، جن کی مدت جون میں مکمل ہوگی۔