وزیر داخلہ محسن نقوی کا انسانی اسمگلنگ میں ملوث مافیا کے خلاف بلا امتیاز کارروائی کا حکم

اسلام آباد: وزیر داخلہ محسن نقوی نے غیر قانونی امیگریشن اور انسانی اسمگلنگ میں ملوث مافیا کے خلاف بلا امتیاز سخت کارروائی جاری رکھنے کے احکامات دیے ہیں۔

محسن نقوی کی زیر صدارت ہونے والے اجلاس میں وفاقی سیکریٹری داخلہ، ایڈیشنل سیکریٹری داخلہ، ڈائریکٹر جنرل ایف آئی اے اور کراچی و لاہور زون کے ڈائریکٹرز نے شرکت کی۔

 اجلاس میں ایف آئی اے کے امیگریشن ونگ کی کارکردگی، انسانی اسمگلنگ کی روک تھام کے لیے جاری اقدامات اور پیشہ ور بھکاری مافیا کے خلاف کارروائیوں کا جائزہ لیا گیا۔

وزیر داخلہ نے کہا کہ انسانی اسمگلنگ میں ملوث عناصر کسی رعایت کے مستحق نہیں ہیں، ائیرپورٹس پر امیگریشن چیکنگ کے نظام کو مؤثر بنایا جائے اور سفری دستاویزات کی سخت اسکریننگ کی جائے۔

 انہوں نے واضح کیا کہ پاکستان کے نام پر کسی صورت کوئی نقصان برداشت نہیں کیا جائے گا۔