لاہور ہائیکورٹ نے کائٹ فلائنگ ایکٹ 2025 پر فوری پابندی کی درخواست مسترد کر دی

لاہور: لاہور ہائیکورٹ نے کائٹ فلائنگ ایکٹ 2025 پر فوری عملدرآمد روکنے کی درخواست مسترد کر دی اور دونوں فریقین کو آئندہ سماعت کے لیے دلائل پیش کرنے کے لیے طلب کر لیا۔

جسٹس ملک اویس خالد نے جوڈیشل ایکٹوازیم پینل کی جانب سے دائر درخواست کی سماعت کی۔

 درخواست گزار اظہر صدیق ایڈووکیٹ نے عدالت کو بتایا کہ کائٹ فلائنگ ایکٹ 2025 آئین کے بنیادی اصولوں کے خلاف ہے اور پتنگ بازی خونی کھیل ہونے کے باعث شہریوں کی جان کو خطرے میں ڈالتی ہے۔

درخواست گزار نے عدالت سے استدعا کی کہ ایکٹ کو کالعدم قرار دیا جائے اور حتمی فیصلے تک اس پر عملدرآمد روکا جائے، تاہم عدالت نے فوری پابندی کی درخواست مسترد کر دی۔

 عدالتی حکم کے بعد درخواست گزار نے کائٹ فلائنگ ایسوسی ایشن کو فریق بنا دیا۔

عدالت نے سماعت کو 16 جنوری تک ملتوی کرتے ہوئے سرکاری وکیل کو آئندہ دلائل پیش کرنے کی ہدایت دی ہے۔