پاکستان اور جرمنی کے درمیان دوہری شہریت کی باضابطہ اجازت، تاریخی پیش رفت

پاکستان اور جرمنی کے درمیان دوہری شہریت کے حوالے سے ایک اہم اور تاریخی پیش رفت سامنے آئی ہے۔

 جرمنی میں قائم پاکستانی سفارت خانے نے اعلان کیا ہے کہ دونوں ممالک کے درمیان دوہری شہریت سے متعلق تمام قانونی، آئینی اور ضابطہ جاتی تقاضے مکمل کر لیے گئے ہیں۔

اس پیش رفت کے بعد جرمنی کو ان ممالک کی فہرست میں شامل کر لیا گیا ہے جن کے ساتھ پاکستان باضابطہ طور پر دوہری شہریت کی اجازت دیتا ہے۔

 برلن میں پاکستانی سفارت خانے کی جانب سے جاری عوامی نوٹس کے مطابق اب جرمنی میں مقیم پاکستانی نژاد افراد جرمن شہریت حاصل کرنے کے باوجود اپنی پاکستانی شہریت برقرار رکھ سکیں گے، جبکہ اس سے قبل جرمن شہریت کے حصول کے لیے پاکستانی شہریت ترک کرنا لازم تھا۔

سفارتی ذرائع کے مطابق یہ فیصلہ جرمنی میں آباد پاکستانی کمیونٹی کے دیرینہ مطالبے کی تکمیل ہے، جس سے ہزاروں تارکینِ وطن کو قانونی تحفظ اور عملی سہولت حاصل ہوگی۔

 ماہرین کا کہنا ہے کہ اس اقدام سے دونوں ممالک کے درمیان سماجی، معاشی اور سرمایہ کاری کے روابط مزید مضبوط ہوں گے۔

اعلامیے میں مزید بتایا گیا ہے کہ وہ پاکستانی نژاد افراد جنہوں نے ماضی میں جرمن شہریت حاصل کرنے کے لیے پاکستانی شہریت ترک کی تھی، ان کے لیے شہریت کی بحالی (ری ایکوزیشن) سے متعلق طریقۂ کار، شرائط اور درکار دستاویزات کی تفصیلات جلد جاری کی جائیں گی، جس کے لیے متعلقہ اداروں سے مشاورت جاری ہے۔

دوہری شہریت کی اجازت کے بعد جرمنی میں مقیم پاکستانی شہریوں کو روزگار، کاروبار، تعلیم اور سفر کے شعبوں میں نمایاں آسانی میسر آئے گی، جبکہ پاکستان میں جائیداد، بینکاری، سرمایہ کاری اور خاندانی معاملات میں بھی انہیں بہتر قانونی سہولت حاصل ہوگی۔

پاکستان پہلے ہی امریکا، برطانیہ، کینیڈا، آسٹریلیا اور متعدد یورپی و مشرقِ وسطیٰ کے ممالک کے ساتھ دوہری شہریت کی اجازت دیتا ہے، اور اب جرمنی کی شمولیت سے یورپ میں مقیم پاکستانیوں کے لیے سہولیات میں نمایاں اضافہ ہوا ہے۔