چینی جنگی طیارہ جے-10سی ای کی پہلی جنگی کامیابی کا باضابطہ اعلان

چین کی قومی دفاعی سائنس و ٹیکنالوجی صنعت بیورو نے تصدیق کی ہے کہ چینی ساختہ جنگی طیارے جے-10سی ای نے مئی 2025 میں اپنی پہلی عملی جنگی کامیابی حاصل کی۔

 یہ پہلا موقع ہے کہ چین کے کسی سرکاری ادارے نے اس طیارے کی میدانِ جنگ میں کامیاب کارکردگی کا باضابطہ اعلان کیا ہے۔

بیان میں اگرچہ مئی میں ہونے والی فضائی جھڑپوں کا حوالہ دیا گیا ہے، تاہم انڈیا اور پاکستان کے درمیان کشیدگی یا جنگ کا براہِ راست ذکر نہیں کیا گیا۔ 

اس سے قبل پاکستان کی مسلح افواج نے مئی کی جھڑپ کے فوراً بعد رفال سمیت بھارت کے چھ طیارے مار گرانے کا دعویٰ کیا تھا، جبکہ نومبر میں اقوام متحدہ کی جنرل اسمبلی سے خطاب کے دوران وزیرِ اعظم شہباز شریف نے سات بھارتی طیارے گرائے جانے کا اعلان کیا تھا۔

امریکی صدر ڈونلڈ ٹرمپ بھی متعدد مواقع پر مئی کی جھڑپ میں سات سے آٹھ طیاروں کے تباہ ہونے کا ذکر کر چکے ہیں، جبکہ بھارتی آرمی چیف جنرل انیل چوہان نے سنگاپور میں گزشتہ سال اپنے طیاروں کے نقصان کا اعتراف تو کیا تھا مگر تعداد بتانے سے گریز کیا تھا۔

چین کے سٹیٹ ایڈمنسٹریشن آف سائنس، ٹیکنالوجی اینڈ انڈسٹری فار نیشنل ڈیفینس (SASTIND) کے مطابق جے-10سی ای طیاروں نے مئی میں فضائی لڑائی کے دوران متعدد دشمن طیاروں کو مار گرایا اور خود کسی نقصان سے محفوظ رہے۔

چینی سرکاری خبر ایجنسی کے مطابق جے-10سی ای کی اس پہلی جنگی کارکردگی نے عالمی دفاعی ماہرین اور ہوابازی صنعت کی توجہ حاصل کی ہے اور اسے چین کی دفاعی سائنس و ٹیکنالوجی سے متعلق 2025 کی دس اہم ترین خبروں میں بھی شامل کیا گیا ہے۔

سرکاری بیان میں بتایا گیا کہ جے-10سی ای مکمل طور پر چین میں تیار کردہ، آل ویدر، سنگل انجن اور سنگل سیٹ ملٹی رول جنگی طیارہ ہے، جو فضائی برتری، انٹرسیپشن اور مختلف نوعیت کے حملوں کی بھرپور صلاحیت رکھتا ہے۔ 

حکام کے مطابق اس طیارے کی جنگی کامیابی چینی دفاعی مصنوعات کی عالمی منڈی میں ساکھ اور رسائی کو مزید مضبوط بنائے گی۔