امریکا کا ایران پر نیا معاشی دباؤ، ایران سے تجارت کرنے والے ممالک پر 25 فیصد ٹیرف نافذ

امریکی صدر ڈونلڈ ٹرمپ نے ایران کے خلاف معاشی دباؤ میں اضافہ کرتے ہوئے نئی پابندیوں کا اعلان کر دیا ہے۔

 صدر ٹرمپ نے ایران کے ساتھ تجارت کرنے والے تمام ممالک پر امریکا میں 25 فیصد اضافی ٹیرف عائد کرنے کا فیصلہ کیا ہے۔

ٹروتھ سوشل پر جاری بیان میں امریکی صدر نے واضح کیا کہ اضافی ٹیرف کا اطلاق فوری طور پر ہوگا اور یہ فیصلہ حتمی ہے، جس میں کسی قسم کی تبدیلی نہیں کی جائے گی۔ ان کے مطابق اس اقدام کا مقصد ایران پر دباؤ بڑھانا ہے۔

غیر ملکی خبر رساں اداروں کے مطابق یہ فیصلہ ایسے وقت سامنے آیا ہے جب صدر ٹرمپ متعدد بار ایران میں مداخلت کی دھمکیاں دے چکے ہیں اور خبردار کر چکے ہیں کہ امریکا کے پاس انتہائی سخت آپشنز موجود ہیں، جن میں ایران کے خلاف فوجی کارروائی بھی شامل ہے۔

امریکی انتظامیہ کا کہنا ہے کہ وہ ایرانی اپوزیشن رہنماؤں سے بھی رابطے میں ہے تاکہ ایران کی صورتحال پر قریبی نظر رکھی جا سکے۔

دوسری جانب ایران کے وزیر خارجہ عباس عراقچی نے کہا ہے کہ ان کی حکومت امریکا کی جانب سے موصول ہونے والی تجاویز کا تفصیلی جائزہ لے رہی ہے اور امریکی خصوصی نمائندے اسٹیو وٹکوف کے ساتھ رابطے بدستور قائم ہیں۔

عباس عراقچی نے امریکی صدر کے اس بیان پر بھی ردعمل دیا جس میں کہا گیا تھا کہ اگر احتجاج پرتشدد ہوا تو فوجی کارروائی کی جا سکتی ہے، اور اسے ’’دہشت گرد عناصر کو اکسانے‘‘ کے مترادف قرار دیا۔

واضح رہے کہ ایران میں حکومت مخالف مظاہرے جاری ہیں، جبکہ ایک امریکی انسانی حقوق تنظیم کے مطابق گزشتہ دو ہفتوں کے دوران ان مظاہروں میں اب تک 490 افراد ہلاک ہو چکے ہیں۔