گورنر خیبرپختونخوا: وزیراعلیٰ بتائیں، دہشت گردی میں افغانستان ملوث نہیں تو کون ذمہ دار؟

گورنر خیبرپختونخوا فیصل کریم کنڈی نے پشاور میں نیوز کانفرنس کے دوران وزیراعلیٰ پر تنقید کرتے ہوئے سوال اٹھایا کہ اگر افغانستان دہشت گردی میں ملوث نہیں تو صوبے میں پولیس، ایف سی، فوجی جوان اور عام شہریوں کو شہید کرنے والے کون ہیں؟

انہوں نے کہا کہ کچھ لوگ چاہتے ہیں کہ فوج صوبے سے نکل جائے اور آپریشن نہ کیا جائے، لیکن کیا پولیس خالی ہاتھ سے لڑے گی؟ گورنر نے مزید کہا کہ صوبے کو وفاق کی طرف سے جو وسائل فراہم کیے گئے، ان کا درست استعمال کہاں ہوا؟ ضم اضلاع میں کیا کوئی تھانہ قائم کیا گیا؟

فیصل کریم کنڈی نے کہا کہ عالمی برادری تسلیم کرتی ہے کہ افغانستان کی سرزمین دہشت گردی کے لیے استعمال ہو رہی ہے، اور پاکستان نے بین الاقوامی فورمز پر بتایا کہ افغان زمین بھارت اور اسرائیل کے پاکستان مخالف اقدامات میں استعمال ہو رہی ہے۔

انہوں نے صوبے میں اچانک آئی ڈی پیز کے آنے کے خدشات کا بھی ذکر کیا اور کہا کہ تمام اسٹیک ہولڈرز کو مل کر تیاری کرنی چاہیے۔

گورنر نے وزیراعلیٰ کے کراچی میں رویے پر بھی حیرت کا اظہار کیا اور کہا کہ صوبے کی صورتحال پر وہ یہاں زیادہ توجہ دیں، جبکہ سیاسی جماعتوں اور متعلقہ اداروں کو مشترکہ طور پر دہشت گردی کے خلاف اقدامات کرنے چاہئیں۔