سمگلنگ کے خلاف بڑا اقدام، ایف بی آر کا ڈیجیٹل انفورسمنٹ اسٹیشن قائم کرنے کا فیصلہ

فیڈرل بورڈ آف ریونیو (ایف بی آر) نے سمگلنگ اور غیرقانونی تجارتی سرگرمیوں کی روک تھام کے لیے ڈیجیٹل انفورسمنٹ اسٹیشن قائم کرنے کا فیصلہ کر لیا ہے۔

 ایف بی آر ذرائع کے مطابق اس نئے نظام کو سمگلنگ اور غیرقانونی تجارت کے خلاف کارروائی کے مکمل اختیارات حاصل ہوں گے۔

ذرائع کا کہنا ہے کہ ڈیجیٹل انفورسمنٹ اسٹیشن کے تحت اشیاء کی غیرقانونی تجارت اور سمگلنگ میں ملوث افراد کے خلاف گرفتاری سمیت مؤثر کارروائیاں کی جائیں گی۔

 اس منصوبے کے قیام کے لیے ایف بی آر نے 10 ارب روپے کے فنڈز کی ڈیمانڈ بھی کر دی ہے۔

ایف بی آر حکام کے مطابق موجودہ چیک پوسٹوں کو بھی مرحلہ وار ڈیجیٹل انفورسمنٹ اسٹیشنز میں تبدیل کیا جائے گا، جس سے نگرانی اور کارروائی کا نظام مزید مؤثر ہو سکے گا۔

 اس کے ساتھ ساتھ جدید ٹیکنالوجی، واضح آپریشنل قواعد اور ڈیجیٹل مانیٹرنگ سسٹم متعارف کرایا جائے گا۔

ذرائع کے مطابق ڈیجیٹل انفورسمنٹ اسٹیشن کے لیے خالی آسامیوں پر آرمڈ فورسز کے ریٹائرڈ افسران اور اہلکاروں کو کنٹریکٹ بنیادوں پر بھرتی کرنے کا بھی فیصلہ کیا گیا ہے۔