حماس نے غزہ کے انتظامی امور آزاد فلسطینی ٹیکنوکریٹک اتھارٹی کے حوالے کر دیے

فلسطینی مزاحمتی تنظیم حماس نے غزہ کی انتظامی ذمہ داریاں ایک آزاد فلسطینی ٹیکنوکریٹک ادارے کے حوالے کرنے کے احکامات جاری کر دیے ہیں۔ 

تنظیم کی جانب سے واضح کیا گیا ہے کہ غزہ میں موجود تمام سرکاری اور انتظامی ڈھانچے اب اس خودمختار اتھارٹی کے تحت کام کریں گے۔

حماس کے ترجمان حازم قاسم نے تصدیق کرتے ہوئے کہا کہ یہ فیصلہ امریکی صدر ڈونلڈ ٹرمپ کے غزہ امن کونسل کے قیام سے متعلق حالیہ بیان کے بعد کیا گیا ہے۔

 انہوں نے کہا کہ غزہ کے انتظامی امور سے دستبرداری کا فیصلہ حتمی اور غیر مبہم ہے تاکہ نئی اتھارٹی بغیر کسی رکاوٹ کے اپنی ذمہ داریاں انجام دے سکے۔

یہ اقدام اس معاہدے کا حصہ ہے جس کے تحت غزہ میں جنگ بندی ممکن ہوئی تھی۔ ٹرمپ کے منصوبے پر شرم الشیخ میں دستخط کیے گئے اور اس میں غزہ کے انتظامی ڈھانچے سے متعلق نکات واضح کیے گئے۔

حازم قاسم نے یاد دلایا کہ فلسطینی سیاسی دھڑوں کے درمیان یہ پہلے بھی طے پایا تھا کہ غزہ کا نظم و نسق ایک عارضی فلسطینی کمیٹی کے سپرد کیا جائے گا، جو آزاد شخصیات اور مقامی ماہرین پر مشتمل ہوگی۔

 24 اکتوبر کو قاہرہ میں ہونے والے فلسطینی اجلاس میں بھی اس پر اتفاق ہوا تھا۔

واضح رہے کہ حماس کے سیاسی بیورو کے رکن باسم نعیم نے بھی اعلان کیا تھا کہ غزہ میں بااختیار فلسطینی حکومت کے قیام کے بعد حماس انتظامی کردار سے الگ ہونے کے لیے تیار ہے۔