قومی پیغامِ امن کمیٹی کا قومی بیانیے کے فروغ کے لیے پاک فوج سے مکمل تعاون کا اعلان

قومی پیغامِ امن کمیٹی (این پی اے سی) نے قومی بیانیے کے فروغ اور ریاستی مؤقف کی مضبوطی کے لیے مکمل تعاون کی یقین دہانی کرا دی ہے۔

 اس سلسلے میں این پی اے سی کے وفد نے پاک فوج کے شعبہ تعلقاتِ عامہ کے ڈائریکٹر جنرل لیفٹیننٹ جنرل احمد شریف چوہدری سے جنرل ہیڈکوارٹرز میں ملاقات کی۔

آئی ایس پی آر کے مطابق ملاقات میں کالعدم ٹی ٹی پی اور ٹی ٹی اے المعروف فتنہ الخوارج کے تناظر میں ملکی داخلی سلامتی کی صورتحال پر تفصیلی تبادلہ خیال کیا گیا، جس سے مشترکہ مؤقف کو مزید تقویت ملی۔

 اس موقع پر کشمیر اور غزہ کے حوالے سے پاکستان کے اصولی مؤقف کی بھی توثیق کی گئی۔

ڈی جی آئی ایس پی آر نے اس موقع پر کہا کہ قومی سلامتی کے معاملات میں ہم آہنگی اور متفقہ بیانیہ وقت کی اہم ضرورت ہے، جبکہ مظلوم اقوام کی حمایت پاکستان کی اخلاقی ذمہ داری ہے۔

شرکاء نے قومی بیانیے کے فروغ، پاک افواج سے غیر متزلزل یکجہتی اور ریاست مخالف بیانیوں کے خلاف مشترکہ عزم کا اظہار کیا۔

 این پی اے سی نے فتنہ الخوارج اور افغان طالبان کی سخت الفاظ میں مذمت کرتے ہوئے واضح کیا کہ دہشتگردی کسی صورت قابلِ قبول نہیں۔

کمیٹی نے اعلان کیا کہ منبر و محراب کے ذریعے اتحادِ امت، سماجی ہم آہنگی اور آئینی مساوات کا پیغام ملک بھر میں عام کیا جائے گا، جبکہ نفرت انگیزی، فرقہ واریت اور تکفیری سوچ کے خلاف زیرو ٹالرنس پالیسی اپنانے پر بھی اتفاق کیا گیا۔

مزید برآں این پی اے سی نے ریاستی بیانیے کو مؤثر بنانے کے لیے مساجد، مدارس اور جامعات میں آگاہی نشستوں میں اضافے کی تجویز پیش کی۔

 ڈی جی آئی ایس پی آر نے کہا کہ دشمن کی نفسیاتی جنگ کا مؤثر جواب عوامی شعور اور حقائق پر مبنی بیانیہ ہے، جو ایک فیصلہ کن ہتھیار ثابت ہو سکتا ہے۔