پاکستان اور یو اے ای کے درمیان پری امیگریشن کلیئرنس پر اتفاق، کراچی سے پائلٹ منصوبے کا آغاز

وفاقی وزیر داخلہ محسن نقوی سے متحدہ عرب امارات کے اعلیٰ سطحی وفد نے ملاقات کی، جس میں پاکستان اور یو اے ای کے درمیان امیگریشن کے عمل کو مزید آسان بنانے پر تفصیلی تبادلہ خیال کیا گیا۔

ملاقات کے دوران دونوں ممالک نے پری امیگریشن کلیئرنس کے باضابطہ معاہدے پر اتفاق کیا۔ وفاقی وزیر داخلہ کے مطابق اس نئے نظام کا آغاز ابتدائی طور پر پائلٹ منصوبے کے تحت کراچی سے کیا جائے گا۔

محسن نقوی نے بتایا کہ پری امیگریشن کلیئرنس کے تحت مسافروں کی امیگریشن اور دیگر ضروری کارروائیاں پاکستان میں ہی مکمل ہوں گی،

 جس کے بعد یو اے ای پہنچنے پر انہیں طویل امیگریشن مراحل سے نہیں گزرنا پڑے گا اور وہ ڈومیسٹک سفر کی طرح براہِ راست ایئرپورٹ سے باہر نکل سکیں گے۔

انہوں نے کہا کہ یہ اقدام مسافروں کے لیے وقت کی بچت، سفر میں آسانی اور مجموعی تجربے کو بہتر بنانے میں اہم کردار ادا کرے گا۔

یو اے ای کے وفد نے اس منصوبے کو دونوں ممالک کے عوام کے لیے فائدہ مند قرار دیتے ہوئے مکمل تعاون کی یقین دہانی کرائی۔ 

حکام کے مطابق پائلٹ منصوبے کی کامیابی کے بعد اس نظام کو مرحلہ وار دیگر شہروں تک توسیع دی جائے گی۔