پنجاب میں ماحول دوست ٹرانسپورٹ کا فروغ، سرکاری محکموں میں پیٹرول و ڈیزل گاڑیوں کی خرید پر پابندی

پنجاب حکومت نے ماحولیاتی تحفظ اور ماحول دوست ٹرانسپورٹ کے فروغ کے لیے اہم فیصلہ کرتے ہوئے صوبے کے سرکاری محکموں میں پیٹرول اور ڈیزل سے چلنے والی گاڑیوں کی خریداری پر پابندی عائد کرنے کا اعلان کر دیا ہے۔

چیف سیکریٹری پنجاب کے مطابق آئندہ سرکاری استعمال کے لیے صرف الیکٹرک یا ہائبرڈ گاڑیاں ہی خریدی جا سکیں گی، تاہم فیلڈ ڈیوٹی انجام دینے والی گاڑیوں کو اس فیصلے سے استثنیٰ حاصل ہوگا۔

انہوں نے بتایا کہ این او سی حاصل کرنے والے 170 نئے پیٹرول پمپس پر الیکٹرک وہیکل چارجنگ اسٹیشنز کی تنصیب لازمی قرار دی گئی ہے۔ ان کا کہنا تھا کہ گرین انرجی کا فروغ حکومت کی ترجیح ہے تاکہ ماحولیاتی آلودگی میں کمی لائی جا سکے۔

چیف سیکریٹری نے مزید کہا کہ صوبے میں نئی الیکٹرک وہیکل (ای وی) پالیسی جلد متعارف کرائی جائے گی اور مستقبل میں الیکٹرک چارجنگ یونٹس کے بغیر کسی نئے پیٹرول پمپ کو کام کی اجازت نہیں دی جائے گی۔