پاکستان اور سری لنکا کا ثقافتی تعاون بڑھانے اور مذہبی سیاحت کے فروغ پر اتفاق

اسلام آباد میں جاری ایک سرکاری بیان کے مطابق پاکستان اور سری لنکا نے دوطرفہ ثقافتی تعاون کو وسعت دینے اور مذہبی سیاحت کو فروغ دینے پر اتفاق کیا ہے۔

یہ پیش رفت پاکستان کے وفاقی وزیر برائے قومی ثقافت و ورثہ اورانزیب خان خچی اور سری لنکا کے سفیر رئیر ایڈمرل (ریٹائرڈ) فریڈ سینویراٹنے کے درمیان اسلام آباد میں ہونے والی ملاقات کے دوران سامنے آئی۔

 ملاقات میں دونوں ممالک نے مشترکہ ثقافتی نمائشوں اور ورثے سے متعلق پروگراموں کے انعقاد کے عزم کا اظہار کیا۔

بیان کے مطابق پاکستان میں مذہبی سیاحت کے وسیع مواقع موجود ہیں جہاں سکھ، بدھ اور ہندو زائرین کے علاوہ دیگر مذاہب سے تعلق رکھنے والے افراد بھی اپنے مقدس مقامات کی زیارت کر سکتے ہیں۔ 

ان میں اسلامی مزارات، ہندو مندر، سکھ گردوارے اور بدھ مت کے تاریخی آثار شامل ہیں۔

وفاقی وزیر اورانزیب خچی نے کہا کہ مذہبی سیاحت عوام کے درمیان روابط مضبوط بنانے اور ثقافتی مکالمے کو فروغ دینے کا مؤثر ذریعہ ثابت ہو سکتی ہے۔ 

انہوں نے بتایا کہ دونوں ممالک کے مستند ٹور آپریٹرز کو خصوصی مذہبی اور ثقافتی دوروں کے انعقاد میں شامل کیا جائے گا۔

بیان میں کہا گیا کہ پاکستان اور سری لنکا کے فنکاروں، ہنرمندوں اور ثقافتی اداروں کو اپنے فن اور ورثے کے اظہار کے مواقع فراہم کرنے کے لیے مشترکہ نمائشیں، آرٹ ایگزیبیشنز اور ورثہ پروگرام منعقد کیے جائیں گے۔

سری لنکن سفیر کو پاکستان میں موجود بدھ مت کے اہم تاریخی مقامات کے ورچوئل ٹورز سے بھی آگاہ کیا گیا تاکہ عالمی سطح پر پاکستان کے ثقافتی ورثے کو اجاگر کیا جا سکے۔

سفیر نے ٹیکسلا اور لاہور سمیت پاکستان کے میوزیمز میں محفوظ فن تعمیر اور قیمتی نوادرات میں گہری دلچسپی کا اظہار کیا۔

 بیان میں یاد دلایا گیا کہ 2021 میں سری لنکا کے 14 رکنی بدھ مت راہبوں کے وفد نے پاکستان کے مقدس مقامات کا زیارتی دورہ کیا تھا اور پاکستان کو بدھ مت کی قدیم اور منفرد تہذیبوں میں سے ایک کا مرکز قرار دیا تھا۔

پاکستان اور سری لنکا کے تعلقات دیرینہ ہیں اور دونوں ممالک مختلف شعبوں میں تعاون جاری رکھے ہوئے ہیں۔ گزشتہ سال دسمبر میں پاکستان نے شدید سیلاب کے بعد سری لنکا کو امدادی سامان اور ریسکیو ٹیمیں بھی فراہم کی تھیں۔