وزارت صنعت و پیداوار کا پاکستان اسٹیل میں چوریوں پر ایف آئی اے کو خط

 وزارت صنعت و پیداوار نے پاکستان اسٹیل میں ہونے والی چوریوں کے معاملے پر وفاقی تحقیقاتی ادارے (ایف آئی اے) کو خط ارسال کر دیا ہے۔

خط میں پاکستان اسٹیل کے قیمتی اثاثوں، مشینری، کیبلز اور اسکریپ کی چوری کی جامع تحقیقات اور 24 دسمبر کے اسکریپ چوری کیس میں ملوث ملازمین اور سرپرست افسران کی نشاندہی کی درخواست کی گئی ہے۔

وزارت کے مطابق دسمبر میں 36 ٹن اسکریپ چوری ہوا، جس پر ملزمان کو گرفتار کر کے مسروقہ سامان برآمد کر لیا گیا۔ تحقیقات میں سامنے آیا کہ گیٹ نمبر 05 سے بغیر گیٹ پاس چوری شدہ سامان کی نقل و حمل کی گئی۔

ملازمین سجاد حسین خان اور نثار احمد پر اسکریپ چوری میں سہولت کاری کا الزام ہے۔ مزید یہ بھی انکشاف ہوا کہ گمراہ کن بیانات کے باعث ملزمان کی ضمانت منظور ہوئی۔

اندرونی انکوائری میں پاکستان اسٹیل انتظامیہ اور ڈی ایس جی سیکیورٹی کی کوتاہی سامنے آئی، جبکہ خط میں ایف آئی اے کو افسران، سیکیورٹی گارڈز، ڈی ایس جی اہلکاروں اور اسکریپ ڈیلرز کے خلاف جامع تحقیقات کی سفارش بھی کی گئی ہے۔