پاکستان کے آئی ٹی شعبے نے برآمدات میں نئی تاریخ رقم کر دی

دسمبر 2025 میں پاکستان کے آئی ٹی شعبے نے شاندار کارکردگی کا مظاہرہ کرتے ہوئے برآمدات کا نیا تاریخی ریکارڈ قائم کر دیا۔ 

سرکاری اعداد و شمار کے مطابق پہلی مرتبہ کسی ایک ماہ میں آئی ٹی برآمدات 437 ملین ڈالر سے تجاوز کر گئیں، جو ملکی تاریخ میں ایک اہم سنگِ میل ہے۔

ماہ بہ ماہ بنیاد پر آئی ٹی برآمدات میں 23 فیصد اضافہ ریکارڈ کیا گیا، جو نومبر 2025 کے 356 ملین ڈالر کے مقابلے میں نمایاں بہتری ہے۔

 اسی طرح سال بہ سال موازنے میں بھی 26 فیصد اضافہ دیکھنے میں آیا، جو پاکستان کی ڈیجیٹل معیشت کے لیے نہایت حوصلہ افزا پیش رفت قرار دیا جا رہا ہے۔

موجودہ مالی سال 2025-26 کی پہلی ششماہی میں آئی ٹی برآمدات سال بہ سال بنیاد پر 20 فیصد اضافے کے ساتھ 2.24 ارب ڈالر تک پہنچ چکی ہیں۔

 یہ اعداد و شمار اس بات کا ثبوت ہیں کہ آئی ٹی سیکٹر پاکستان کی برآمدی معیشت کا ایک مضبوط ستون بنتا جا رہا ہے۔

واضح رہے کہ آئی ٹی کا شعبہ ایس آئی ایف سی (Special Investment Facilitation Council) کے ترجیحی شعبوں میں شامل ہے، جس کے فروغ کے لیے وزارتِ آئی ٹی و ٹیلی کام، ایس آئی ایف سی کے تعاون سے تیز رفتار اور مؤثر اقدامات کر رہی ہے۔

حالیہ دنوں منعقد ہونے والی آئی ٹی سی این ایشیا نمائش کے دوران آئی ٹی اور ٹیلی کام کے شعبے میں 750 ملین ڈالر کی بین الاقوامی سرمایہ کاری سے متعلق مفاہمتی یادداشتوں پر دستخط ہونا اس شعبے پر عالمی اعتماد کا واضح اظہار ہے۔

یہ تمام پیش رفت حکومت، متعلقہ وفاقی وزارت اور ایس آئی ایف سی کی مربوط پالیسیوں اور عملی اقدامات کی عکاس ہے، جو مستقبل میں آئی ٹی برآمدات کو مزید بلندیوں تک لے جا سکتی ہیں۔