بورڈ آف پیس کو اقوام متحدہ کا متبادل بنانے کا ارادہ نہیں: امریکی صدر ڈونلڈ ٹرمپ

امریکی صدر ڈونلڈ ٹرمپ نے واضح کیا ہے کہ غزہ اور عالمی تنازعات کے لیے قائم کیا جانے والا بورڈ آف پیس اقوام متحدہ کا متبادل نہیں ہے۔

واشنگٹن میں میڈیا سے گفتگو کرتے ہوئے صدر ٹرمپ نے ایک بار پھر پاک بھارت جنگ رکوانے کے دعوے کو دہرایا اور کہا کہ اگر جنگ نہ رکتی تو ایک سے دو کروڑ افراد مارے جا سکتے تھے۔

 ان کے مطابق وزیراعظم شہباز شریف نے بھی کہا کہ آپ نے کروڑوں زندگیاں بچائیں۔

صدر ٹرمپ نے کہا کہ وہ روس یوکرین جنگ کے خاتمے کے لیے بھی کوششیں کر رہے ہیں، جبکہ اقوام متحدہ کسی بھی بڑی جنگ کو رکوانے میں مؤثر کردار ادا نہیں کر سکا۔

 تاہم انہوں نے واضح کیا کہ بورڈ آف پیس کو اقوام متحدہ کے متبادل کے طور پر نہیں دیکھا جا رہا اور اقوام متحدہ کو اپنا کردار ادا کرتے رہنا چاہیے۔

انہوں نے مزید کہا کہ ایران کی صورتحال پر گہری نظر رکھی جا رہی ہے، جبکہ گرین لینڈ کے معاملے پر ایسا حل نکالا جائے گا جس سے نیٹو بھی خوش ہو اور امریکا بھی۔ 

صدر ٹرمپ نے جی سیون اجلاس میں شرکت نہ کرنے کا اعلان بھی کیا۔