پلاسٹک سرجری کے بعد پیچیدگیوں سے برازیلین سوشل میڈیا انفلوئنسر انتقال کر گئیں

برازیل سے تعلق رکھنے والی سوشل میڈیا انفلوئنسر بیانکا ڈیاس 27 سال کی عمر میں پلاسٹک سرجری کے بعد پیدا ہونے والی پیچیدگیوں کے باعث انتقال کر گئیں۔

میڈیا رپورٹس کے مطابق بیانکا سرجری کے بعد ساؤ پاؤلو کے قریب اپنے اہلِ خانہ کے گھر صحت یاب ہو رہی تھیں کہ اچانک انہیں شدید سانس کی تکلیف لاحق ہو گئی۔ 

انہیں فوری طور پر اسپتال منتقل کیا گیا، جہاں ڈاکٹروں نے پھیپھڑوں میں خون کے لوتھڑے (پلمونری ایمبولزم) کی تشخیص کی، تاہم تمام تر کوششوں کے باوجود ان کی جان نہ بچائی جا سکی۔

بیانکا کی قریبی دوست نے انسٹاگرام پر خبر کی تصدیق کرتے ہوئے بتایا کہ صحت یابی کے دوران انہیں دو مرتبہ دورے پڑے اور بعد ازاں پھیپھڑوں میں خون کا لوتھڑا بن گیا، جس کے باعث ان کی حالت انتہائی تشویشناک ہو چکی تھی۔

اگرچہ سرجری کی نوعیت سے متعلق کوئی باضابطہ تفصیلات سامنے نہیں آئیں، تاہم اطلاعات کے مطابق وہ آپریشن کے صرف 18 دن بعد انتقال کر گئیں۔ 

بیانکا کے سوشل میڈیا پر تقریباً 60 ہزار فالوورز تھے، جہاں وہ لائف اسٹائل اور ماڈلنگ سے متعلق مواد شیئر کرتی تھیں۔

واقعے کی وجوہات جاننے کے لیے مقامی حکام نے تحقیقات کا آغاز کر دیا ہے۔