یو اے ای ایمبیسیڈر کپ 2026: جیریز نے قطر ایمبیسی کو فائنل میں 5-2 سے شکست دے کر ٹائٹل جیت لیا

اسلام آباد: 14ویں یو اے ای ایمبیسیڈر کپ رمضان فٹبال ٹورنامنٹ کے فائنل میں جیریز پاکستان نے قطر ایمبیسی کو 5-2 سے شکست دے کر ٹائٹل اپنے نام کر لیا۔

فائنل میں خیام خٹک نے تین اور ثاقب انور نے ایک گول کر کے ٹیم کو فتح دلوائی۔ 

تیسرے مقام کے میچ میں افغانستان نے وزارت خارجہ کی ٹیم کو 4-1 سے ہرا دیا۔

اختتامی تقریب کے مہمان خصوصی وفاقی وزیر اطلاعات و نشریات عطاء اللہ تارڑ تھے، جنہوں نے متحدہ عرب امارات کے سفیر سالم محمد سالم البواب الزعابی اور پاکستان فٹبال فیڈریشن کے صدر سید محسن گیلانی کے ہمراہ کھلاڑیوں میں انعامات تقسیم کیے۔

اس موقع پر مراکش، لبنان، افغانستان، لیبیا، رومانیہ کے سفیروں، قومی اسمبلی کی رکن سیدہ آمنہ بتول، سینئر حکام اور سفارتی عملے کی بڑی تعداد نے شرکت کی۔

سالانہ یہ ٹورنامنٹ پاکستان میں یو اے ای سفارتخانے اور پاکستان فٹبال فیڈریشن کے تعاون سے رمضان کے دوران کھیلوں، ثقافتی روابط اور کمیونٹی ہم آہنگی کو فروغ دینے کے لیے منعقد کیا گیا۔