ملتان سلطانز کی پاکستان سپر لیگ میں دوبارہ واپسی

ملتان سلطانز باضابطہ طور پر پاکستان سپر لیگ میں واپس آ گئی ہے، جہاں پہلے سیالکوٹ سٹالینز کے نام سے جانے جانے والی فرنچائز کو اب ملتان سلطانز کا نام دے دیا گیا ہے۔

پی ایس ایل کے چیف ایگزیکٹو آفیسر سلمان نصیر نے کہا کہ یہ نام تبدیل کرنے کی درخواست گوہر شاہ نے کی تھی، اور چھ ممکنہ ناموں میں سے منتخب کر کے ٹیم کو ملتان سلطانز کے نام سے دوبارہ متعارف کرایا گیا۔

سلمان نصیر نے مزید کہا کہ شائقین بے صبری سے پی ایس ایل کے آغاز کا انتظار کر رہے ہیں، پہلا میچ اور افتتاحی تقریب لاہور میں ہوگی، اور لیگ کی تیاریاں زوروشور سے جاری ہیں۔

گوہر شاہ نے جنوبی پنجاب کی نمائندگی کی واپسی پر خوشی کا اظہار کرتے ہوئے کہا کہ ان کے لیے یہ ضروری تھا کہ پی ایس ایل میں ملتان سلطانز کی ٹیم موجود ہو، اور فرنچائز کی پرفارمنس شائقین اور پاکستان کرکٹ ٹیم دونوں کے لیے فائدہ مند ہو۔

ان کے پارٹنر حمزہ مجید نے کہا کہ بڑے مقاصد حاصل کرنے کے لیے صحیح پارٹنرشپ ضروری ہوتی ہے، اور گوہر شاہ ذہین اور کرکٹ سے خاص لگاؤ رکھنے والے شخص ہیں۔