اسٹاک مارکیٹ: سہولت اکاؤنٹ کے ذریعے سرمایہ کاری کی حد 30 لاکھ روپے کر دی گئی

سیکیورٹیز اینڈ ایکسچینج کمیشن آف پاکستان نے اعلان کیا ہے کہ اسٹاک مارکیٹ میں سہولت اکاؤنٹ کے ذریعے سرمایہ کاری کی حد 10 لاکھ روپے سے بڑھا کر 30 لاکھ روپے کر دی گئی ہے۔

اعلامیے کے مطابق، اب سرمایہ کار ایک سے زائد بروکرز کے ساتھ سہولت اکاؤنٹس کھول سکیں گے۔

 سہولت اکاؤنٹ شناختی کارڈ کے ذریعے آن لائن کھولا جا سکتا ہے۔

سیکیورٹیز اینڈ ایکسچینج کمیشن کے اعلامیے میں بتایا گیا کہ اسٹاک مارکیٹ میں انفرادی سرمایہ کاروں کی تعداد 5 لاکھ 42 ہزار ہے جبکہ انویسٹر اکاؤنٹس اور روشن ڈیجیٹل اکاؤنٹس کی تعداد 1 لاکھ 44 ہزار ہے۔

اعلامیے میں یہ بھی کہا گیا کہ نوجوان سہولت اکاؤنٹ کے ذریعے کیپٹل مارکیٹ میں سرمایہ کاری کریں اور غیر مجاز غیر ملکی سرمایہ کاری پلیٹ فارمز کے بجائے پاکستان اسٹاک ایکسچینج میں سرمایہ کاری کریں۔