اسلامو فوبیا جیسے چیلنج سے نمٹنے کیلئے عملی اقدامات ناگزیر ہیں: عاصم افتخار

عاصم افتخار احمد، جو اقوام متحدہ میں پاکستان کے مستقل مندوب ہیں، نے اسلامو فوبیا جیسے بڑھتے ہوئے عالمی مسئلے سے نمٹنے کے لیے عملی اقدامات کی ضرورت پر زور دیا ہے۔

نیویارک میں اقوام متحدہ کی جنرل اسمبلی میں اسلامو فوبیا کے خلاف عالمی دن کے موقع پر خطاب کرتے ہوئے انہوں نے کہا کہ کسی بھی کمیونٹی کو اس کے مذہب یا عقیدے کی بنیاد پر نشانہ نہیں بنانا چاہیے۔

انہوں نے کہا کہ ہر انسان کو اپنے مذہب پر عمل کرنے کی آزادی حاصل ہے اور اسلامو فوبیا ایک عالمی مسئلہ بن چکا ہے جس سے نمٹنے کے لیے مشترکہ اقدامات ضروری ہیں۔

ان کا کہنا تھا کہ اسلامو فوبیا سے دنیا بھر کے کروڑوں مسلمانوں کے جذبات مجروح ہوتے ہیں اور اس کی ایک بڑی وجہ غلط معلومات کا پھیلاؤ ہے۔

عاصم افتخار احمد نے ایک بار پھر زور دیا کہ اس چیلنج سے نمٹنے کے لیے سنجیدہ اور عملی اقدامات ناگزیر ہیں۔