عمران خان کے بیٹے کی پاکستان کا جی ایس پی پلس سٹیٹس متنازع بنانے کی کوشش

اسلام آباد: بانی پاکستان تحریک انصاف (پی ٹی آئی) عمران خان کے بیٹے قاسم خان نے پاکستان کے جی ایس پی پلس سٹیٹس کو متنازع بنانے کی کوشش کی ہے۔

قاسم خان نے یورپی یونین سے پاکستان کا جی ایس پی پلس سٹیٹس ختم کرنے کا مطالبہ کیا اور اس مطالبے میں بلوچ نیشنل موومنٹ کے رہنما نسیم بلوچ کے ساتھ رابطہ کیا۔

قاسم خان کا کہنا تھا کہ انسانی حقوق کی خلاف ورزیوں کی وجہ سے یورپی یونین پاکستان کا جی ایس پی پلس سٹیٹس ختم کرے۔ انہوں نے اپنی مثال دیتے ہوئے کہا کہ میرے والد جیل میں ہیں۔

پاکستان مخالف اس مطالبے پر سیاسی اور عوامی حلقوں نے شدید ردعمل ظاہر کیا۔

 ماہرین نے کہا کہ اگر جی ایس پی پلس سٹیٹس ختم ہوا تو پاکستان کی ٹیکسٹائل برآمدات خطرے میں پڑ جائیں گی، کیونکہ جی ایس پی پلس کے تحت پاکستان کی ٹیکسٹائل مصنوعات یورپی منڈیوں میں خصوصی رسائی حاصل کرتی ہیں۔

تحلیل کاروں کے مطابق، قاسم خان کے مطالبے سے پاکستان کا تجارتی خسارہ بڑھے گا، زرمبادلہ میں کمی آئے گی اور ٹیکسٹائل سیکٹر میں بحران اور بیروزگاری میں اضافہ ہوگا۔

 پاکستان میں لاکھوں افراد ٹیکسٹائل شعبے سے وابستہ ہیں، اور ذاتی یا سیاسی بنیاد پر ملک کے خلاف مہم قومی مفاد کے منافی اور معاشی نقصان دہ ہے۔

 قاسم خان کے بیانات سے پاکستان کا عالمی تشخص متاثر اور بیرونی دباؤ بڑھ سکتا ہے۔

یاد رہے کہ قاسم خان اس سے قبل بھی متنازع شخصیات سے ملاقات کر چکے ہیں۔