انڈیا فٹبال فیڈریشن کے صدر پر ہراسانی کا الزام

بھارت کے فٹبال فیڈریشن کے صدر کلیان چاوبے پر فیڈریشن کی سینئر آفیشل اور ویمن کمیٹی کی سربراہ ولانکا الیماو نے ہراسانی کا الزام عائد کر دیا ہے۔

بھارتی میڈیا کے مطابق ولانکا الیماو نے الزام لگایا کہ فیڈریشن کے صدر اور دیگر اعلیٰ حکام نے اجلاس کے دوران ان کے ساتھ طنز و تضحیک، روک ٹوک اور بدتمیزی کا مظاہرہ کیا۔ 

ہراسانی کا واقعہ آل انڈیا فٹبال فیڈریشن کے دہلی میں ہونے والے ایگزیکٹو کمیٹی اجلاس میں پیش آیا۔

ولانکا الیماو نے باقاعدہ ایک خط کے ذریعے صدر پر الزامات لگائے جس میں کہا گیا کہ اجلاس کے دوران انہیں ٹارگٹ کیا گیا اور ان کی آواز کو دبایا گیا، صدر نے غیر ضروری ریمارکس دیے اور بد تہذیبی کا مظاہرہ کیا گیا۔ 

خط میں یہ بھی بتایا گیا کہ یہ سب ان کو ڈرانے دھمکانے کے ارادے سے کیا گیا۔