ایم ڈی کیٹ کے امتحانات کے حوالے سے اہم فیصلہ، وفاقی وزیرِ صحت کا اعلان

وفاقی وزیرِ صحت مصطفٰی کمال نے اعلان کیا ہے کہ ایم ڈی کیٹ کے امتحانات کے حوالے سے اہم فیصلہ کیا گیا ہے اور پی ایم ڈی سی نے آئندہ سال سے میڈیکل کالجز میں داخلہ پالیسی میں تبدیلی کرنے کا فیصلہ کیا ہے۔

وزیرِ صحت کے مطابق آئندہ سال سے ایف ایس سی کے نتائج آنے کے 6 دن بعد ایم ڈی کیٹ کا داخلہ ٹیسٹ شروع ہوگا۔ 

اس سے پہلے ایم ڈی کیٹ کا امتحان ایف ایس سی کے نتائج کے 4 سے 6 ماہ بعد لیا جاتا تھا، جس کی وجہ سے طلبہ کو دو مرتبہ تیاری کرنی پڑتی تھی۔

مصطفٰی کمال نے کہا کہ اس فیصلے سے اکیڈمی مافیا کے ذریعے والدین سے لاکھوں روپے وصول کرنے کا سلسلہ ختم ہوگا۔ 

امیر والدین مہنگی ٹیوشن فیس دے کر تیاری کر لیتے تھے، جبکہ متوسط گھرانوں کے بچے محروم رہ جاتے تھے۔ 

نئی پالیسی سے بچوں کو کروڑوں روپے کی بچت ہوگی اور اضافی تیاری کی ضرورت نہیں رہے گی۔

وزیرِ صحت نے مزید بتایا کہ ادویہ سازی کے لیے خام مال موجود ہے اور نرسنگ کونسل کے امور بھی حل ہو چکے ہیں، کونسل اب فعال ہے۔