جنگ کے خاتمے کے لیے سفارتکاری ناگزیر ہے، ترجمان دفتر خارجہ

ترجمان دفتر خارجہ طاہر حسن اندرابی نے ہفتہ وار بریفنگ میں کہا ہے کہ خطے میں جاری کشیدگی کے خاتمے کے لیے فوری اور مستقل حل تلاش کرنا ضروری ہے، جبکہ پاکستان نے سفارتکاری اور مذاکرات کو ہی مسائل کا واحد مؤثر راستہ قرار دیا ہے۔

بریفنگ کے دوران ترجمان نے بتایا کہ حالیہ 4 ملکی مشاورت میں مختلف امور پر تفصیلی تبادلہ خیال کیا گیا، جس میں خطے میں جنگ کے جلد اور مستقل خاتمے کے امکانات پر غور کیا گیا۔

 انہوں نے کہا کہ اس تنازعے کے باعث نہ صرف خطے بلکہ دنیا بھر میں انسانی جانوں اور معاشی سرگرمیوں کو شدید نقصان پہنچ رہا ہے، جس پر گہری تشویش کا اظہار کیا گیا۔

ترجمان کے مطابق ان مشکل حالات میں مسلم اُمہ کا اتحاد انتہائی اہم ہے۔ انہوں نے بتایا کہ پاکستان کے نائب وزیراعظم اور وزیر خارجہ نے آنے والے وفود کو ممکنہ امریکا اور ایران مذاکرات کے حوالے سے آگاہ کیا، جن کے انعقاد کے لیے اسلام آباد کو ممکنہ مقام کے طور پر زیر غور لایا جا رہا ہے۔

انہوں نے مزید کہا کہ وزرائے خارجہ نے کشیدگی کم کرنے، فوجی تصادم کے خطرے کو روکنے اور مذاکرات کے لیے سازگار ماحول پیدا کرنے پر زور دیا، جبکہ اقوام متحدہ کے چارٹر، خودمختاری اور علاقائی سالمیت کے احترام کی اہمیت بھی اجاگر کی گئی۔

مزید برآں، نائب وزیراعظم و وزیر خارجہ اسحاق ڈار کے حالیہ دورۂ چین کو اہم پیشرفت قرار دیا گیا، جس میں دونوں ممالک نے خطے میں امن کے لیے مشترکہ 5 نکاتی منصوبہ پیش کیا۔ اس منصوبے میں جنگ بندی، انسانی امداد، خودمختاری کے احترام اور سفارتکاری کے فروغ پر زور دیا گیا۔

اسی منصوبے میں آبنائے ہرمز میں جہاز رانی کے تحفظ کو بھی اہم قرار دیا گیا۔ ایران کی جانب سے پاکستانی جہازوں کو گزرنے کی اجازت کو مثبت پیشرفت قرار دیا گیا۔

ترجمان نے بتایا کہ وزیراعظم شہباز شریف اور وزیر خارجہ نے عالمی رہنماؤں سے مسلسل رابطے کیے، جنہیں عالمی سطح پر سراہا جا رہا ہے۔

آخر میں، کئی مسلم ممالک نے اسرائیل کی جانب سے یروشلم میں مذہبی پابندیوں کی مذمت کرتے ہوئے عالمی برادری سے مؤثر اقدامات کا مطالبہ کیا۔