یورپی یونین کے کلاؤڈ سسٹمز پر سائبر حملہ، 92 جی بی ڈیٹا چوری

یورپی یونین کے زیرِ استعمال کلاؤڈ نظام پر بڑے سائبر حملے کے بعد تقریباً 92 جی بی ڈیٹا چوری کر لیا گیا۔

CERT-EU کی رپورٹ کے مطابق حملہ آوروں نے ایمازون ویب سروسز کے ایک متاثرہ اکاؤنٹ کے ذریعے یورپی اداروں کے پلیٹ فارم تک رسائی حاصل کی، جہاں مختلف اداروں کی ویب سائٹس اور خدمات موجود تھیں۔

چرائے گئے ڈیٹا میں نام، ای میل پتے اور پیغامات کا مواد شامل ہے، جس سے اندرونی رابطوں اور ذاتی معلومات کے افشا ہونے کے خدشات بڑھ گئے ہیں۔

 کم از کم 29 یورپی ادارے اور متعدد صارفین اس حملے سے متاثر ہوئے۔

تحقیقات کے مطابق یہ ایک سپلائی چین حملہ تھا، جس میں ہیکرز نے پہلے ایک اوپن سورس سیکیورٹی ٹول کو نشانہ بنایا، خفیہ کلید حاصل کی اور اسی کے ذریعے نظام میں داخل ہو کر ڈیٹا نکال لیا۔

 بعد ازاں یہ ڈیٹا ShinyHunters نے آن لائن جاری کر دیا۔