پاکستان کی سعودی عرب پر میزائل اور ڈرون حملوں کی شدید مذمت

پاکستان نے سعودی عرب پر ہونے والے میزائل اور ڈرون حملوں کی شدید مذمت کرتے ہوئے توانائی تنصیبات کو نشانہ بنانے پر گہری تشویش کا اظہار کیا ہے۔

ترجمان دفتر خارجہ کے مطابق پاکستان ان حملوں کی سختی سے مذمت کرتا ہے اور سعودی عرب کے مشرقی علاقے میں اہم توانائی تنصیبات کو نشانہ بنانے کو تشویشناک قرار دیتا ہے۔

ترجمان نے حملوں میں قیمتی جانوں کے ضیاع پر افسوس کا اظہار کرتے ہوئے متاثرہ خاندانوں سے تعزیت بھی کی۔ 

انہوں نے کہا کہ یہ حملے سعودی عرب کی خودمختاری اور علاقائی سالمیت کی سنگین خلاف ورزی ہیں۔

پاکستان نے خبردار کیا کہ ایسے اقدامات سے خطے میں کشیدگی مزید بڑھے گی اور امن و استحکام کو خطرہ لاحق ہو سکتا ہے۔

 ترجمان کے مطابق پاکستان سعودی حکومت اور عوام کے ساتھ مکمل یکجہتی کا اظہار کرتا ہے اور مملکت کی سلامتی کے لیے اپنی غیر متزلزل حمایت کا اعادہ کرتا ہے۔