پاک فضائیہ جدید ٹیکنالوجی سے لیس ایک مضبوط فورس ہے۔ نیول چیف

چیف آف نیول سٹاف ایڈمرل نوید اشرف نے کہا ہے کہ پاک فضائیہ جدید ٹیکنالوجی سے لیس ایک مضبوط فورس ہے۔

 پی اے ایف اکیڈمی رسالپور میں GDP-152 اور الائیڈ کورسز کی گریجویشن پریڈ کی پروقار تقریب منعقد ہوئی، جس میں اعلیٰ عسکری قیادت نے شرکت کی۔ تقریب میں چیف آف نیول سٹاف ایڈمرل نوید اشرف مہمانِ خصوصی تھے، جبکہ ایئر چیف مارشل ظہیر احمد بابر سدھو نے بھی شرکت کی۔ 

مہمانِ خصوصی نے پریڈ کا معائنہ کیا اور نمایاں کارکردگی دکھانے والے کیڈٹس کو اعزازات سے نوازا، جبکہ پاس آؤٹ ہونے والے کیڈٹس نے حلف بھی اٹھایا۔

 خطاب کرتے ہوئے ایڈمرل نوید اشرف نے پاس آؤٹ ہونے والے کیڈٹس کو مبارکباد دی اور کہا کہ معرکہ حق کے دوران ایئر فورس نے بہترین کارکردگی دکھائی، اصغر خان اکیڈمی سے پاس آؤٹ ہونے والے کیڈٹس کی خدمات کی ایک طویل تاریخ ہے۔ 

انہوں نے کہا کہ پاک فضائیہ جدید ٹیکنالوجی سے لیس ایک مضبوط فورس ہے، جس نے گزشتہ سال مئی میں اپنی صلاحیتوں کا بھرپور مظاہرہ کیا، جبکہ سائبر اور الیکٹرانک وار فیئر میں بھی اپنی مہارت کا لوہا منوایا۔

 نیول چیف نے کہا کہ پاک بحریہ ملک کی بحری سرحدوں کے دفاع میں اہم کردار ادا کر رہی ہے اور پاکستان کسی بھی جارحیت کا منہ توڑ جواب دینے کے لیے ہر وقت تیار ہے۔ 

انہوں نے کہا کہ ایران اور امریکا کے تنازعے اور آبنائے ہرمز کی بندش سے عالمی سطح پر تیل کی سپلائی متاثر ہوئی، جبکہ قوم کی حمایت سے افواج پاکستان دہشتگردی کا کامیابی سے مقابلہ کر رہی ہیں۔ 

مزید برآں، ان کا کہنا تھا کہ پاکستان کی سیاسی اور عسکری قیادت کی کوششوں سے مشرق وسطیٰ میں جنگ بندی ممکن ہوئی، اور انہوں نے تقریب میں شرکت پر ایئر چیف مارشل ظہیر احمد بابر سدھو کا شکریہ بھی ادا کیا۔