امریکی سائنسدانوں کی پراسرار اموات، ڈونلڈ ٹرمپ کا ایف بی آئی کو تحقیقات کا حکم

امریکا میں اعلیٰ سطح کے سائنسدانوں اور حکام کی پراسرار اموات اور گمشدگیوں کے معاملے پر وائٹ ہاؤس نے ایف بی آئی اور دیگر اداروں کو تحقیقات کا حکم دے دیا ہے۔

وائٹ ہاؤس کی پریس سیکریٹری کیرولائن لیوٹ کے مطابق حکومت ان واقعات کی حقیقت جاننے کے لیے تمام ضروری اقدامات کر رہی ہے۔

انہوں نے کہا کہ بڑھتے ہوئے سوالات اور خدشات کے پیش نظر تمام کیسز کا مشترکہ جائزہ لیا جا رہا ہے تاکہ کسی ممکنہ تعلق یا مشترکہ پہلو کی نشاندہی ہو سکے۔

یہ معاملہ اس وقت سامنے آیا جب ایک صحافی نے وائٹ ہاؤس بریفنگ میں سوال اٹھایا، جس کے بعد باقاعدہ تحقیقات شروع کر دی گئیں۔

رپورٹس کے مطابق 2024 سے اب تک خلائی، جوہری اور ایرو اسپیس پروگرامز سے وابستہ متعدد اہم سائنسدان پراسرار حالات میں ہلاک یا لاپتا ہو چکے ہیں، جن میں ریٹائرڈ ایئر فورس جنرل ولیم نیل بھی شامل ہیں۔

ان واقعات کے بعد سوشل میڈیا پر تشویش میں اضافہ ہوا ہے اور بعض صارفین نے ممکنہ دشمن عناصر کے ملوث ہونے کا خدشہ ظاہر کیا ہے۔

دوسری جانب سابق صدر ڈونلڈ ٹرمپ نے بھی اس صورتحال پر تشویش کا اظہار کیا ہے اور کہا ہے کہ اگرچہ یہ واقعات اتفاقی بھی ہو سکتے ہیں، لیکن جلد حقیقت سامنے آ جائے گی۔