’میں کیوں نہ بولوں‘؟ ہسپانوی اداکار جیویر بارڈیم فلسطین کی حمایت میں کھل کر سامنے آگئے
ہسپانوی اداکار جیویر بارڈیم عراق جنگ کی مخالفت اور غزہ کے معاملے پر اسرائیلی کارروائیوں پر تنقید کے حوالے سے اپنے واضح مؤقف کے باعث جانے جاتے ہیں۔
حال ہی میں ایک انٹرویو کے دوران جب ان سے پوچھا گیا کہ وہ اپنے خیالات کا اظہار کیوں کرتے ہیں تو انہوں نے کہا کہ ان کے نزدیک سوال یہ نہیں کہ وہ کیوں بولتے ہیں بلکہ یہ ہے کہ وہ کیوں نہ بولیں۔ ان کے مطابق ایک فنکار کے طور پر انہیں یہ حق حاصل ہے کہ وہ اپنے اردگرد ہونے والی ناانصافیوں پر آواز اٹھائیں۔
بارڈیم نے کہا کہ وہ اپنی تقریروں اور بیانات میں ہمیشہ اس بات کو ذہن میں رکھتے ہیں کہ وہ ریکارڈ کیے جا رہے ہیں اس لیے وہ ان امور پر بات کرتے ہیں جنہیں وہ غلط سمجھتے ہیں۔ انہوں نے کہا کہ غزہ کے حوالے سے ان کے مؤقف پر انہیں کسی تقریب میں مخالفت کا سامنا بھی کرنا پڑ سکتا تھا تاہم انہیں عوامی سطح پر مثبت ردعمل بھی ملا۔
انہوں نے انڈسٹری میں ممکنہ دباؤ اور ’بلیک لسٹ‘ کیے جانے کے خدشات کا ذکر کرتے ہوئے کہا کہ اگرچہ انہیں بعض پراجیکٹس یا برانڈز سے دور رکھنے کی باتیں سننے کو ملی ہیں لیکن اس کے باوجود انہیں نئے مواقع بھی مل رہے ہیں۔ ان کے مطابق وہ اس بات کو زیادہ اہمیت دیتے ہیں کہ ان کی آواز سنی جا رہی ہے۔
مردانگی کے موضوع پر بات کرتے ہوئے بارڈیم نے کہا کہ انہیں ایسی ثقافت میں پرورش ملی جہاں مردوں کو طاقتور اور غالب سمجھا جاتا تھا جو ان کے مطابق ایک غلط تصور ہے۔ انہوں نے کہا کہ بطور والد وہ اس بات سے فکر مند ہیں کہ معاشرہ دوبارہ پرانی سوچ کی طرف جا سکتا ہے۔
انہوں نے اپنی والدہ اداکارہ پیلار بارڈیم کو خراجِ تحسین پیش کرتے ہوئے کہا کہ ان کی والدہ نے زندگی میں بہت جدوجہد کی اور وقار کے ساتھ اپنی جگہ بنائی جس سے انہوں نے بہت کچھ سیکھا۔
اپنی اہلیہ اور اداکارہ پینیلوپ کروز کے بارے میں بات کرتے ہوئے بارڈیم نے کہا کہ وہ گھر میں کام کے معاملات پر زیادہ گفتگو نہیں کرتے تاکہ پیشہ ورانہ اور ذاتی زندگی میں توازن برقرار رہے۔ انہوں نے اپنی اہلیہ کو ایک باصلاحیت، باکردار اور قابلِ احترام شخصیت قرار دیا اور کہا کہ وہ ان کی بہت قدر کرتے ہیں۔
بارڈیم نے یہ بھی کہا کہ انہیں اپنی اہلیہ کے ساتھ کام کرنا اس لیے پسند ہے کیونکہ اس سے انہیں ایک دوسرے کو بہتر سمجھنے اور جذباتی طور پر قریب آنے کا موقع ملتا ہے۔
