عائشہ عمر نے غیر ازدواجی تعلقات سے متعلق منسوب بیان کو جھوٹ اور بے بنیاد قرار دے دیا

پاکستانی اداکارہ اور ماڈل عائشہ عمر نے سوشل میڈیا پر ان سے منسوب کیے جانے والے غیر ازدواجی تعلقات سے متعلق متنازع بیان کی سختی سے تردید کی ہے۔

حال ہی میں سوشل میڈیا پر ایک دعویٰ وائرل ہوا جس میں کہا گیا کہ عائشہ عمر نے کہا ہے کہ جو مرد گھر میں سکون نہیں پاتے انہیں غیر ازدواجی تعلقات قائم کر لینے چاہئیں۔

تاہم اداکارہ نے انسٹاگرام پر وضاحت دیتے ہوئے اس دعوے کو مکمل طور پر جھوٹا اور من گھڑت قرار دیا۔

انہوں نے اپنی پوسٹ میں کہا کہ یہ بات سراسر غلط ہے، وہ نہ کبھی ایسی سوچ رکھ سکتی ہیں اور نہ ہی ایسا کوئی بیان دے سکتی ہیں۔ 

ان کے مطابق دھوکا دہی اور غیر ازدواجی تعلقات ان کے نزدیک مکمل طور پر ناقابلِ قبول ہیں۔

عائشہ عمر نے مزید کہا کہ لوگوں کو چاہیے کہ کسی بھی خبر کو پھیلانے سے پہلے اس کی تصدیق کریں اور جھوٹی باتوں سے کسی کی ساکھ خراب نہ کریں۔

وہ پاکستان کی معروف اداکاراؤں میں شمار ہوتی ہیں اور کئی کامیاب ڈراموں میں اپنی اداکاری کے جوہر دکھا چکی ہیں۔