لسبیلہ ہیلی کاپٹر حادثہ: شہداء کو سلام، قربانی کی تیسری برسی پر قوم کا خراجِ عقیدت

1 اگست 2022 کو بلوچستان کے ضلع لسبیلہ میں پیش آنے والے پاک فوج کے ہیلی کاپٹر حادثے کو تین سال مکمل ہو چکے ہیں، مگر قوم کے دلوں میں شہداء کی یاد آج بھی تازہ ہے۔

یہ افسوسناک واقعہ اس وقت پیش آیا جب بلوچستان میں شدید بارشوں اور سیلاب کے دوران امدادی سرگرمیاں جاری تھیں۔ کور کمانڈر کوئٹہ لیفٹیننٹ جنرل سرفراز علی خود ریسکیو مشن کی قیادت کر رہے تھے تاکہ ریلیف آپریشن کو مؤثر بنایا جا سکے۔ بدقسمتی سے خراب موسم کے باعث ہیلی کاپٹر گر کر تباہ ہو گیا۔

اس حادثے میں پاک فوج کے درج ذیل افسران اور جوان شہید ہوئے:

• لیفٹیننٹ جنرل سرفراز علی
• بریگیڈیئر امجد حنیف (جنہیں حادثے سے قبل میجر جنرل کے عہدے پر ترقی دی گئی تھی)
• بریگیڈیئر محمد خالد
• میجر سعید احمد (پائلٹ)
• میجر محمد طلحہ
• نائیک مدثر فیاض

یہ واقعہ نہ صرف ایک حادثہ بلکہ قومی سانحہ تھا، جس نے پوری قوم کو سوگوار کر دیا۔ شہداء نے اپنی جانوں کا نذرانہ عوامی خدمت اور قومی فریضے کی ادائیگی کے دوران پیش کیا۔

لیفٹیننٹ جنرل سرفراز علی ایک نڈر، پروفیشنل اور وطن سے بے پناہ محبت رکھنے والے افسر تھے۔ نومبر 2020 میں انہیں لیفٹیننٹ جنرل کے عہدے پر ترقی دی گئی اور دسمبر 2020 میں کور کمانڈر کوئٹہ مقرر کیا گیا۔

یہ حادثہ یاد دہانی ہے کہ پاک فوج ہمیشہ قوم کے شانہ بشانہ کھڑی رہی ہے، چاہے وہ قدرتی آفت ہو یا کوئی اور قومی بحران۔ لسبیلہ کے شہداء کی قربانیاں کبھی فراموش نہیں کی جائیں گی۔