اسلام آباد اور راولپنڈی کے طلبہ کو کوکین سپلائی کرنے والا نیٹ ورک بے نقاب، نائیجیرین خاتون گرفتار

پاکستان - 20 اگست 2025

اینٹی نارکوٹکس فورس نے اسلام آباد اور راولپنڈی میں تعلیمی اداروں کے طلبہ کو کوکین سپلائی کرنے والے نیٹ ورک کو بے نقاب کرتے ہوئے ایک غیر ملکی خاتون کو گرفتار کرلیا۔

گرفتار خاتون کی شناخت نائیجیریا سے تعلق رکھنے والی وصیلت اموسا عرف علابہ کے نام سے ہوئی ہے جسے اسلام آباد کے سیکٹر H-13 میں فلیٹ سے رنگے ہاتھوں گرفتار کیا گیا۔

کارروائی کے دوران 180 گرام کوکین اور ملزمہ کا پاسپورٹ بھی برآمد کرلیا گیا۔ تحقیقات کے مطابق خاتون مختلف تعلیمی اداروں میں طلبہ کو منشیات فراہم کرنے میں ملوث تھی۔

اینٹی نارکوٹکس فورس نے ملزمہ کے خلاف مقدمہ درج کرکے مزید تفتیش شروع کر دی ہے۔