سرحدی ناکامیوں کے بعد بھارت چین سے مذاکرات پر مجبور

دنیا - 20 اگست 2025

لائن آف ایکچوئل کنٹرول (ایل اے سی) پر برسوں کے طویل فوجی تنازع کے بعد مودی حکومت چین کے ساتھ مذاکرات کی میز پر بیٹھنے پر مجبور ہو گئی ہے، جو ماہرین کے مطابق بھارتی ناکامی کا واضح اعتراف ہے۔

دی ٹربیون انڈیا کے مطابق بھارت اور چین سرحدی تنازع پر مذاکرات کریں گے تاکہ سرحدی علاقوں میں دیرپا امن قائم ہو سکے۔

چینی وزارت خارجہ کے ترجمان نے کہا کہ چینی وزیر خارجہ اور بھارتی قومی سلامتی کے مشیر اجیت دوول کے درمیان ملاقات ہو گی۔

ترجمان نے مزید کہا کہ چین مثبت اور تعمیری رویہ اپناتے ہوئے سرحدی امور اور امن پر بات چیت کے لیے تیار ہے۔ ان کا کہنا تھا کہ ایس آرز کے درمیان بات چیت سرحدی مذاکرات کے لیے اعلیٰ سطح کے چینل کا کام کرتی ہے۔

چین نے مزید کہا کہ وہ بھارت کے ساتھ پائیدار، صحت مند اور مستحکم تعلقات کو فروغ دینے کے لیے تیار ہے۔

سیاسی و عسکری تجزیہ کاروں کے مطابق مودی سرکار کی عسکری و سفارتی ناکامیوں نے بھارت کے علاقائی قیادت کے کھوکھلے دعوے بے نقاب کر دیے ہیں جبکہ بھارت کا خودمختاری کا بیانیہ محض ایک سیاسی نعرہ رہ گیا ہے۔