برطانیہ کی پاکستان، بھارت اور بنگلادیش کو ویزا پابندیوں کی تنبیہ

دنیا - 10 ستمبر 2025

برطانوی ہوم سیکریٹری شبانہ محمود نے ان ممالک کو متنبہ کیا ہے جو اپنے پناہ گزینوں کو واپس لینے سے انکار کرتے ہیں۔ انہوں نے کہا کہ ایسے ممالک کے شہریوں کے لیے ویزا جاری کرنے کا عمل معطل کیا جا سکتا ہے۔ ماضی میں جن ممالک نے اس معاملے میں تعاون نہیں کیا، ان میں پاکستان، بھارت اور بنگلادیش شامل ہیں۔

شبانہ محمود کا کہنا تھا کہ برطانیہ کی سرحدوں کو محفوظ بنانا ان کی اولین ترجیح ہے۔ انہوں نے واضح کیا کہ اگر کسی شخص کو برطانیہ میں رہنے کا قانونی حق نہیں تو اس کے آبائی ملک کو اسے واپس لینا پڑے گا۔ انہوں نے مزید کہا کہ رواں سال 30 ہزار سے زائد افراد کا کشتیوں کے ذریعے برطانیہ آنا "ناقابلِ قبول" ہے۔