وزیراعظم شہباز شریف سے بحرین کے وزیر داخلہ کی ملاقات

وزیراعظم محمد شہباز شریف سے بحرین کے وزیر داخلہ جنرل راشد بن عبداللہ آل خلیفہ نے آج اسلام آباد میں وزیراعظم ہاؤس میں ملاقات کی۔ وزیراعظم نے بحرینی وزیر داخلہ کا پرتپاک استقبال کیا اور بحرین کے بادشاہ عزت مآب حمد بن عیسیٰ آل خلیفہ کے لیے نیک خواہشات کا اظہار کیا۔

ملاقات کے دوران وزیراعظم نے کہا کہ پاکستان اور بحرین کے درمیان گہرے برادرانہ تعلقات ہیں جو وقت کے ساتھ مزید مضبوط ہو رہے ہیں۔ انہوں نے دونوں ممالک کے درمیان تجارت سمیت مختلف شعبوں میں تعاون بڑھانے کی خواہش کا اظہار کیا۔ وزیراعظم نے بحرین میں مقیم ایک لاکھ 20 ہزار سے زائد پاکستانی کمیونٹی کے دونوں ممالک کی ترقی میں کردار کو سراہا۔

شہباز شریف نے بحرینی سرمایہ کاروں اور کاروباری افراد کے لیے تیز تر ویزا پراسیسنگ کی سہولیات فراہم کرنے کی پیشکش کی۔ انہوں نے کہا کہ پاکستان بحرین سے مختلف شعبوں میں سرمایہ کاری کی امید رکھتا ہے، اور اس مقصد کے لیے خصوصی سرمایہ کاری سہولت کونسل (SIFC) نمایاں کردار ادا کر رہی ہے۔ انہوں نے بحرین کے پولیس اہلکاروں کی نیشنل پولیس اکیڈمی، اسلام آباد میں تربیت کی بھی پیشکش کی۔

بحرین کے وزیر داخلہ نے پاکستان میں شاندار استقبال اور مہمان نوازی پر وزیراعظم کا شکریہ ادا کیا۔ ملاقات میں نائب وزیراعظم و وزیر خارجہ اسحاق ڈار، وفاقی وزیر داخلہ محسن نقوی، وزیر مملکت برائے داخلہ طلال چوہدری اور دیگر اعلیٰ حکام بھی موجود تھے۔