وفاقی آئینی عدالت کا پہلا فیصلہ ‘ پشاور ہائیکورٹ کا حکم معطل، خیبرپختونخوا حکومت کی اپیل منظور

پاکستان کی پہلی وفاقی آئینی عدالت نے اپنا پہلا فیصلہ سناتے ہوئے خیبرپختونخوا حکومت کی اپیل پر پشاور ہائیکورٹ کا فیصلہ معطل کر دیا اور حکمِ امتناع جاری کر دیا۔ 

جسٹس حسن رضوی کی سربراہی میں دو رکنی بنچ نے کیس کی سماعت کی، جس میں آجر و اجیر (employer–employee) سے متعلق پشاور ہائیکورٹ کا حکم چیلنج کیا گیا تھا۔

سماعت کے دوران جسٹس حسن رضوی نے ریمارکس دیے کہ غریب مزدور سیکورٹی ڈیپازٹ کے نام پر اتنی رقم کہاں سے لائے گا؟ ایڈیشنل ایڈووکیٹ جنرل شاہ فیصل نے مؤقف اختیار کیا کہ قانون کے مطابق اگر نجی ادارہ ملازم کو نکالے گا تو اسے واجبات ادا کرنا ہوں گے، اور اگر وہ ایسا نہ کرے تو مزدور اپیل کر سکتا ہے۔ 

ان کے مطابق پشاور ہائیکورٹ نے نجی ادارے کی اپیل کے ساتھ سیکورٹی ڈیپازٹ کی شرط ختم کر دی تھی، جسے بحال کرنے کی استدعا کی گئی۔

عدالت نے فریقین کو نوٹسز جاری کیے اور پشاور ہائیکورٹ کے فیصلے پر حکمِ امتناع جاری کر دیا۔