دہشت گرد احسان اللّٰہ کا اعتراف: خوارج کے فتنہ سے نوجوان متاثر، پاک فوج حقیقی مسلمان

دہشت گرد احسان اللّٰہ نے فتنہ الخوارج کے حوالے سے بیان میں کہا ہے کہ وہ محسود قوم سے تعلق رکھتے ہیں اور خوارج نوجوانوں کو مذہب کے نام پر فوج کے خلاف اکساتے ہیں۔

احسان اللّٰہ نے اعتراف کیا کہ انہوں نے دہشت گرد کمانڈرز زبدری، مشتاق، گرنیڈ اور اسلام الدین کے لیے تین سال سہولت کاری فراہم کی اور تتور میں پولیس اسٹیشن اور بکتربند گاڑی پر حملے سمیت متعدد کارروائیاں کیں۔

انہوں نے بتایا کہ خوارج نوجوانوں کو ذاتی مفادات کے لیے بدکاری اور دہشت گردی کی راہ پر دھکیلتے ہیں اور خود بداخلاقی پر عمل کرتے ہیں۔ احسان اللّٰہ کا کہنا تھا کہ خوارج حقیقت میں کافر اور مرتد ہیں، جبکہ پاکستانی فوج کے جوان حقیقی مسلمان ہیں۔

دہشت گرد نے کہا کہ انہوں نے پاک فوج کے جوانوں کو پانچ وقت نماز ادا کرتے دیکھا اور خود نماز و کلمے سیکھے، اور نوجوانوں سے اپیل کی کہ دہشت گرد عناصر کے خاتمے کے لیے پاک فوج کا ساتھ دیں۔ احسان اللّٰہ نے اعتراف کیا کہ خوارج کی وجہ سے وہ اور ان کے ساتھی تباہ و برباد ہو گئے ہیں۔