بھارتی پرچم لہرانے پر طلحہ انجم تنقید کی زد میں، گلوکار کا دوٹوک ردعمل

پاکستانی ریپر طلحہ انجم کو نیپال میں کنسرٹ کے دوران بھارتی پرچم لہرانے پر شدید تنقید کا سامنا ہے، جس کے بعد انہوں نے اس معاملے پر اپنا مؤقف واضح کر دیا ہے۔

گزشتہ روز سوشل میڈیا پر ایک ویڈیو وائرل ہوئی جس میں طلحہ انجم کو بھارتی پرچم لہراتے اور اسے اپنے کندھے پر اوڑھتے ہوئے دیکھا گیا۔ کنسرٹ کے شرکا کے مطابق یہ اقدام خیر سگالی، امن اور مختلف ممالک سے آنے والے حاضرین کے احترام کے طور پر کیا گیا تھا۔

کنسرٹ کی ویڈیوز تیزی سے سوشل میڈیا پر پھیل گئیں اور اس پر صارفین کی جانب سے ملا جلا ردعمل سامنے آیا۔ کچھ لوگوں نے اسے فن کی سرحدوں سے بالاتر حیثیت قرار دیتے ہوئے سراہا۔

دوسری جانب، متعدد صارفین نے اس عمل پر ناراضی کا اظہار کرتے ہوئے کہا کہ اگرچہ دوسرے ممالک سے نفرت رکھنا درست نہیں، لیکن ایسے ملک کے پرچم کو تھامنا مناسب نہیں جو اکثر پاکستان کو عالمی سطح پر منفی انداز میں پیش کرتا ہے۔ ان کے مطابق، عزت نفس بھی اہم ہے۔

اس تنقید کے جواب میں طلحہ انجم نے ’ایکس‘ پر جاری پیغام میں کہا کہ ان کے دل میں کسی کے لیے نفرت نہیں اور ان کا فن کبھی سرحدوں کا پابند نہیں رہا۔ انہوں نے مزید کہا کہ اگر بھارتی پرچم لہرانے سے تنازع پیدا ہوا ہے تو وہ یہ اقدام دوبارہ بھی کریں گے۔

طلحہ انجم کا کہنا تھا کہ انہیں میڈیا، حکومتوں کی جنگی فضا یا پروپیگنڈے کی کوئی پروا نہیں، اور اردو ریپ ہمیشہ سرحدوں سے آزاد رہے گا۔

واضح رہے کہ مئی میں پاکستان اور بھارت کے درمیان چار روزہ فوجی جھڑپ کے بعد دونوں ملکوں کے تعلقات میں کشیدگی برقرار ہے اور اس واقعے کے بعد سے بھارت نے پاکستانی فنکاروں اور ٹی وی چینلز کا مکمل بائیکاٹ کر رکھا ہے۔