پاکستان، سری لنکا اور زمبابوے کی ٹی20 سہ ملکی سیریز ‘ ٹرافی کی شاندار رونمائی

پاکستان، سری لنکا اور زمبابوے پر مشتمل ٹی20 سہ ملکی سیریز کی ٹرافی کی رونمائی راولپنڈی کرکٹ اسٹیڈیم میں کردی گئی۔ تقریب میں پاکستان ٹیم کے کپتان سلمان علی آغا اور زمبابوے کے کپتان سکندر رضا نے شرکت کی، جبکہ سری لنکا کی نمائندگی سینئر آل راؤنڈر ڈاسن شاناکا نے کی۔

سری لنکن کپتان چریتھ اسالنکا صحت کی خرابی کے باعث تقریب اور پاکستان کے خلاف تیسرے ون ڈے میں شریک نہ ہو سکے۔ سہ ملکی ٹی20 سیریز کا آغاز پاکستان اور زمبابوے کے درمیان راولپنڈی میں ہونے والے افتتاحی میچ سے ہوگا۔

لیگ مرحلے میں تینوں ٹیمیں 4،4 میچز کھیلیں گی، جبکہ پوائنٹس ٹیبل پر سرفہرست دو ٹیمیں 29 نومبر کو فائنل میں مدمقابل ہوں گی۔

سیریز سے قبل سری لنکا کے دو اہم کھلاڑی چریتھ اسالنکا اور فاسٹ بولر اسیتھا فرنینڈو ذاتی وجوہات کی بنا پر وطن واپس جاچکے ہیں۔ سری لنکن بورڈ کے مطابق کپتان کی غیر موجودگی میں ڈاسن شاناکا ٹیم کی قیادت کریں گے۔