الیکشن کمیشن نے اسلام آباد میں بلدیاتی انتخابات فوری کرانے کا فیصلہ کر لیا

الیکشن کمیشن نے اسلام آباد میں بلدیاتی انتخابات فوری کرانے کا اعلان کرتے ہوئے کہا ہے کہ یونین کونسل سیکرٹری کو انتخابات کرانے کی ذمہ داری دینا آئین و قانون کے منافی ہے۔

اعلامیہ کے مطابق، اسلام آباد کی لوکل گورنمنٹ کی میعاد 14 فروری 2021 کو ختم ہو گئی تھی اور وفاقی حکومت آئین کے آرٹیکل 140-A اور 219 کے تحت 120 دن کے اندر انتخابات کرانے کی پابند ہے۔

 انتخابات مختلف وجوہات کی بنیاد پر تاخیر کا شکار رہے، جبکہ کمیشن نے پانچ بار حلقہ بندی اور تین بار انتخابات کا شیڈول جاری کیا، متعلقہ اداروں سے بھی خط و کتابت کی گئی۔

الیکشن کمیشن نے کیس کی سماعت 13 نومبر 2025 کو کی اور 17 نومبر 2025 کو الیکشن انعقاد کا فیصلہ صادر کیا، اور فوری شیڈول پیش کرنے کی ہدایت دی۔

 کمیشن نے واضح کیا کہ سیکرٹری یونین کونسل کو انتخابات کرانے کی ذمہ داری دینا 2015ء کے لوکل گورنمنٹ ایکٹ کی حالیہ ترامیم کے باوجود آئین کے خلاف ہے۔

اعلامیہ میں کہا گیا کہ الیکشن کمیشن 2017ء کے الیکشن ایکٹ اور 2015ء کے لوکل گورنمنٹ ایکٹ کے تحت ڈی آر اوز، آر اوز اور اے آر اوز تعینات کرنے کا اختیار رکھتا ہے، اور انتخابی عمل انہی افسران کے ذریعے ہوگا جن کی تعیناتی کمیشن بذریعہ نوٹیفکیشن کرے گا۔