واٹس ایپ کا نیا فیچر: صارفین اب فیس بک اور انسٹاگرام جیسا یکساں یوزرنیم بنا سکیں گے

انسٹنٹ میسیجنگ ایپ واٹس ایپ جلد ایسا نیا فیچر متعارف کرانے والی ہے جس کے ذریعے صارفین میٹا کی دیگر ایپس فیس بک اور انسٹاگرام پر ایک ہی جیسا یوزرنیم استعمال کر سکیں گے۔

ٹیکنالوجی ویب سائٹس کے مطابق اس نئے فیچر کے تحت صارفین آئندہ سال اپنا دیرینہ زیرِ بحث یوزرنیم بنا سکیں گے۔ اس کے بعد صارفین اپنا فون نمبر شیئر کیے بغیر صرف یوزرنیم کے ذریعے رابطہ کرسکیں گے۔

نیا فیچر یہ سہولت بھی فراہم کرے گا کہ صارفین وہی ہینڈل واٹس ایپ پر استعمال کر سکیں جو ان کے انسٹاگرام یا فیس بک اکاؤنٹس پر پہلے سے موجود ہے، جس سے میٹا پلیٹ فارمز پر یکسانیت برقرار رکھنا آسان ہوگا۔

واٹس ایپ ایک ’ریزرویشن‘ آپشن بھی متعارف کرائے گا، جس کے ذریعے صارفین عام دستیابی سے پہلے ہی اپنا پسندیدہ یوزرنیم محفوظ کر سکیں گے۔

 اس کے لیے میٹا اکاؤنٹ سینٹر کے ذریعے ویری فکیشن لازمی ہوگی، اور ریزرو ہونے کے بعد وہ یوزرنیم کسی اور کو دستیاب نہیں ہوگا۔

یہ فیچر صارفین کو ایک متعلقہ اور محفوظ رابطے کا جدید حل فراہم کرے گا، جس میں یوزرنیم کی چند شرائط بھی ہوں گی:

یوزرنیم www یا com سے شروع نہیں ہوسکتا، کم از کم ایک حرف لازمی ہے، اور صرف چھوٹے حروف، اعداد، ڈاٹس اور انڈراسکور استعمال کیے جاسکتے ہیں۔

یہ نہ ڈاٹ سے شروع ہوسکتا ہے، نہ ڈاٹ پر ختم، نہ ہی کسی ویب ڈومین جیسا ہوسکتا ہے۔ یوزرنیم کی لمبائی 3 سے 30 حروف کے درمیان ہوگی۔