خیبر پختونخوا میں دو کارروائیاں: سیکیورٹی فورسز نے 23 خوارج ہلاک کر دیے

پاک فوج کے شعبۂ تعلقاتِ عامہ (آئی ایس پی آر) کے مطابق خیبر پختونخوا میں سیکیورٹی فورسز نے دو مختلف کارروائیوں کے دوران 23 بھارتی حمایت یافتہ خوارج کو ہلاک کر دیا۔

آئی ایس پی آر کا کہنا ہے کہ بھارت کے سرپرست دہشت گرد نیٹ ورک کے خلاف آپریشنز میں تیزی لائی گئی ہے۔ خیبر پختونخوا کے اضلاع باجوڑ اور بنوں میں خفیہ اطلاعات کی بنیاد پر آپریشن کیے گئے جن میں بھارتی پراکسی تنظیم "فتنہ الخوارج" سے تعلق رکھنے والے 23 دہشت گرد مارے گئے۔

باجوڑ میں خوارج کی موجودگی کی اطلاع پر کیے گئے آپریشن میں سیکیورٹی فورسز نے دہشت گردوں کے ٹھکانوں کو مؤثر انداز میں نشانہ بنایا، جس کے نتیجے میں ان کے سرغنہ سجاد عرف ابو زر سمیت 11 دہشت گرد ہلاک ہوئے۔

اسی طرح ضلع بنوں میں ایک اور انٹیلی جنس بیسڈ کارروائی میں مزید 12 خوارج کو جہنم واصل کر دیا گیا۔

آئی ایس پی آر کے مطابق دہشت گرد بھارتی سرپرستی میں معصوم شہریوں کو نشانہ بنانے کی کوشش کر رہے تھے، تاہم بنوں میں بم نصب کرتے ہوئے ایک دہشت گرد ہلاک ہوگیا اور حملے کی کوشش ناکام بنا دی گئی۔

ترجمان کے مطابق دہشت گرد مسلسل ناکامی کے بعد نرم اہداف کو نشانہ بنانے کی کوشش کر رہے ہیں لیکن مؤثر کاؤنٹر ٹیررازم کارروائیوں سے ان کی صلاحیتیں بری طرح متاثر ہو رہی ہیں۔

آئی ایس پی آر نے واضح کیا کہ وژن "عزمِ استحکام" کے تحت دہشت گردی کے مکمل خاتمے کا عزم برقرار ہے۔