امریکا نے سعودی عرب کے لیے 142 ارب ڈالر کا دفاعی پیکیج منظور کر لیا

امریکی صدر ڈونلڈ ٹرمپ نے سعودی عرب کے لیے ایک بڑے دفاعی پیکیج کی منظوری دے دی ہے، جس کے تحت سعودی عرب 142 ارب ڈالر مالیت کا اسلحہ امریکا سے خریدے گا۔

وائٹ ہاؤس کے مطابق دونوں ممالک کے درمیان سول نیوکلیئر معاہدے پر بھی اتفاق ہو گیا ہے۔

اعلامیے میں بتایا گیا ہے کہ اس دفاعی معاہدے کے تحت سعودی عرب کو ایف-35 لڑاکا طیارے اور تقریباً 300 ٹینک فراہم کیے جائیں گے۔

مزید یہ کہ امریکا اور سعودی عرب نے کریٹیکل منرلز فریم ورک پر بھی دستخط کیے ہیں تاکہ اہم معدنیات کی سپلائی چین کو محفوظ اور مضبوط بنایا جا سکے۔

یہ ڈیل ان معاشی و تجارتی معاہدوں کا حصہ ہے جو صدر ٹرمپ اس سے قبل مختلف ممالک کے ساتھ کر چکے ہیں، جن کا بنیادی مقصد امریکا کی سپلائی چین کو مستحکم بنانا اور عالمی سطح پر اہم معدنی وسائل تک رسائی میں رکاوٹیں دور کرنا ہے۔

وائٹ ہاؤس کے مطابق یہ فریم ورک دونوں ممالک کی اسٹریٹجک پالیسیاں ہم آہنگ کرتا ہے تاکہ مستقبل میں ضروری معدنیات کی کمی جیسے چیلنج سے بچا جا سکے۔

امریکا اور سعودی عرب نے مصنوعی ذہانت (AI) سے متعلق تاریخی ایم او یو پر بھی دستخط کیے ہیں، جس سے سعودی عرب کو جدید ترین امریکی اے آئی ٹیکنالوجیز تک رسائی ملے گی۔

ادھر سعودی ولی عہد شہزادہ محمد بن سلمان نے اعلان کیا ہے کہ امریکا میں سعودی سرمایہ کاری کو ایک کھرب ڈالر تک بڑھایا جائے گا۔