تنازعات سے کیریئر نہیں بنتا، خود کو ’پاکستانی کنگنا رناوت‘ محسوس کرتی ہوں,,نازش جہانگیر

معروف اداکارہ اور ماڈل نازش جہانگیر نے انکشاف کیا ہے کہ انہیں بار بار بے وجہ تنازعات میں گھسیٹا جاتا ہے، جس کے باعث وہ کبھی کبھار خود کو ’پاکستانی کنگنا رناوت‘ محسوس کرنے لگتی ہیں۔

نازش نے کہا کہ وہ کچھ بھی کہیں، اسے تنازع بنا دیا جاتا ہے، حالانکہ ایسے معاملات سے انہیں کوئی فائدہ نہیں ہوتا۔ ان کا کہنا تھا کہ عام تاثر غلط ہے کہ تنازعات سے کسی اداکارہ کے کیریئر کو فروغ ملتا ہے، بلکہ تنازع سے کیریئر نہیں بنتا۔ انہوں نے واضح کیا کہ کبھی بھی کوئی تنازع انہیں اضافی کام یا مواقع نہیں دے سکا۔

اداکارہ نے اعتراف کیا کہ انہیں تنازعات سے نفرت ہے کیونکہ ایک بار بات پھیل جائے تو اسے کنٹرول کرنا تقریباً ناممکن ہو جاتا ہے۔ وہ ہر غلط فہمی کی وضاحت نہیں کر سکتیں اور نہ ہی ہر شخص کو سچائی سمجھا سکتی ہیں۔

نازش نے بغیر کسی نام لیے کہا کہ ایک بڑی اور مشہور تنازع صرف اس لیے کھڑی کی گئی کیونکہ انہوں نے شادی کا رشتہ قبول کرنے سے انکار کیا تھا۔

انہوں نے بتایا کہ ان کے بارے میں عجیب و غریب افواہیں پھیلائی جاتی رہی ہیں، جن میں یہ دعویٰ بھی شامل ہے کہ وہ خاموشی سے شادی کر چکی ہیں اور شوبز انڈسٹری چھوڑ چکی ہیں۔

اداکارہ نے مزید کہا کہ اگر وہ کسی ڈرامے میں کچھ عرصہ نظر نہ آئیں تو لوگ افواہیں گھڑ لیتے ہیں اور ان کی زندگی کے بارے میں غلط بیانیوں کا سلسلہ شروع ہو جاتا ہے۔