عاطف اسلم پر دلجیت دوسانجھ کا ڈانس کاپی کرنے کا الزام

معروف پاکستانی گلوکار عاطف اسلم کو اکثر بھارتی گلوکار و موسیقار کاپی کرنے کا الزام لگتا رہا ہے، لیکن اس بار بھارتی پنجابی گلوکار و اداکار دلجیت دوسانجھ کی ڈانس کاپی کرنے کا الزام سامنے آیا ہے۔

یہ الزام اس وقت سامنے آیا جب عاطف اسلم کی حالیہ میوزک کنسرٹ کی ویڈیو وائرل ہوئی، جس میں وہ اسٹیج پر پرجوش انداز میں ڈانس کرتے نظر آئے۔

ویڈیو میں عاطف اسلم نے پہلی بار منفرد انداز میں ڈانس کیا، حالانکہ وہ عام طور پر اپنے کنسرٹس میں زیادہ ڈانس نہیں کرتے۔

وائرل ویڈیو کے بعد متعدد شائقین نے ان پر دلجیت دوسانجھ کے ڈانس اسٹائل کی نقل کرنے کا الزام لگایا۔

کچھ صارفین نے عاطف اسلم کے رقص پر تنقید کرتے ہوئے لکھا کہ وہ لوگوں کو ڈانس کے بغیر بھی خوش کر سکتے ہیں۔