’سانول یار پیا‘ میں عالیار کی انگریزی گرامر کی غلطی پر سوشل میڈیا ہل گیا

ڈراما سیریل ’سانول یار پیا‘ کی حالیہ قسط میں مرکزی کردار عالیار کے ایک جملے میں انگریزی کے غلط استعمال پر سوشل میڈیا صارفین نے دلچسپ ردعمل دیا ہے۔

جیو انٹرٹینمنٹ پر نشر ہونے والا یہ ڈراما ناظرین میں کافی مقبول ہے۔ اس کی کاسٹ میں درفشاں سلیم، احمد علی اکبر، فیروز خان، محمود اسلم، یاسر نواز اور دیگر شامل ہیں۔ اسکرپٹ ہاشم ندیم نے لکھا ہے، ہدایت کاری دانش نواز کی اور پروڈکشن 7th اسکائی انٹرٹینمنٹ کی ہے۔

ڈرامے کی کہانی تین مرکزی کرداروں سانول، یار اور پیا کے گرد گھومتی ہے۔ سانول پیا سے محبت کرتا ہے جبکہ پیا عالیار سے محبت کرتی ہے۔

حال ہی میں نشر ہونے والی قسط میں عالیار کے والدین پیا کے گھر رشتے کی بات کے لیے گئے، لیکن پرانی دشمنی کے سبب جھگڑا ہوگیا اور والدین واپس آ گئے۔ گھر واپسی پر عالیار نے والد سے کہا کہ وہ مسائل حل کریں کیونکہ پیا اس کے لیے بہت اہم ہے۔

اسی دوران عالیار نے انگریزی میں کہا: “I can’t live with him”، جہاں اسے ‘her’ استعمال کرنا چاہیے تھا، لیکن اس نے ‘him’ کہہ دیا۔ اس چھوٹی سی گرامر غلطی پر سوشل میڈیا صارفین نے مزاحیہ تبصرے کیے اور حیرت کا اظہار بھی کیا۔

کچھ صارفین نے سوال کیا کہ اگر اداکار سے غلطی ہوگئی تو ہدایت کار نے اسے چیک کیوں نہیں کیا اور ایڈیٹنگ کے دوران درست کیوں نہیں کیا گیا۔