پشاور ایف سی ہیڈکوارٹرز پر حملہ ناکام، صدر اور وزیراعظم کی شدید مذمت — سکیورٹی فورسز کی بروقت کارروائی سے بڑا سانحہ ٹل گیا

صدرِ پاکستان آصف علی زرداری اور وزیراعظم محمد شہباز شریف نے پشاور میں ایف سی ہیڈکوارٹرز پر دہشتگرد حملے کی شدید مذمت کرتے ہوئے شہداء کے خاندانوں سے اظہارِ تعزیت اور زخمیوں کی جلد صحت یابی کی دعا کی ہے

صدر آصف زرداری نے حملے کو بیرونی پشت پناہی رکھنے والے خوارج کی بزدلانہ کارروائی قرار دیتے ہوئے کہا کہ دہشتگردی کے مکمل خاتمے کو اولین ترجیح حاصل ہے۔ انہوں نے سکیورٹی فورسز اور پولیس کی بروقت اور جرات مندانہ کارروائی کو سراہا، جس کی بدولت بڑا نقصان ٹل گیا۔

وزیراعظم شہباز شریف نے زخمیوں کو فوری طبی امداد فراہم کرنے کی ہدایت کرتے ہوئے کہا کہ واقعے کے ذمہ دار عناصر کو جلد شناخت کرکے کیفرِ کردار تک پہنچایا جائے گا۔

 انہوں نے یقین دلایا کہ پاکستان کی سالمیت پر حملہ کرنے والے دہشتگردوں کے ناپاک عزائم کو ہر صورت ناکام بنایا جائے گا اور ملک سے دہشتگردی کے خاتمے کے لیے حکومت پرعزم ہے۔

واضح رہے کہ تین دہشتگردوں نے ایف سی ہیڈکوارٹرز پر حملہ کیا جسے فورسز نے بروقت کارروائی کرتے ہوئے ناکام بنایا۔ 

ایک خودکش بمبار گیٹ پر ہی ہلاک ہوا جبکہ دو حملہ آوروں کو ایف سی جوانوں نے مار گرایا۔ وفاقی وزیرِ داخلہ محسن نقوی نے شہداء کو خراجِ عقیدت پیش کرتے ہوئے زخمیوں کو بہترین علاج فراہم کرنے کی ہدایت کی۔