وزیراعلیٰ خیبرپختونخوا سہیل آفریدی کا پشاور ایف سی ہیڈکوارٹرز پر حملے کی شدید مذمت

وزیراعلیٰ خیبرپختونخوا سہیل آفریدی نے پشاور میں فرنٹیئر کانسٹیبلری ہیڈکوارٹرز پر دہشت گرد حملے کی سخت مذمت کی ہے۔ انہوں نے آئی جی پولیس خیبرپختونخوا سے فوری رپورٹ طلب کی اور زخمیوں کو بہترین اور فوری طبی سہولیات فراہم کرنے کی ہدایت دی۔

وزیراعلیٰ نے کہا کہ جوانوں کی بہادری سے بڑی تباہی سے بچا گیا، اور یہ حملہ انتہائی افسوسناک اور قابلِ مذمت ہے۔ انہوں نے واضح کیا کہ دہشت گردوں کا کوئی مذہب نہیں ہوتا اور ایسے بزدلانہ حملے عوام اور فورسز کے حوصلے پست نہیں کر سکتے۔

 شہداء ہمارا فخر ہیں اور ان کے خون کو رائیگاں نہیں جانے دیا جائے گا۔ سہیل آفریدی نے ملوث عناصر کو کیفر کردار تک پہنچانے کا بھی عزم کیا۔

انہوں نے کہا کہ دہشت گردی کے خلاف جنگ مزید مضبوط عزم کے ساتھ جاری رہے گی، اور قیامِ امن کے لیے تمام وسائل بروئے کار لائے جائیں گے۔

 صوبائی حکومت پولیس اور قانون نافذ کرنے والے اداروں کے ساتھ کھڑی ہے۔ وزیرِ اعلیٰ نے شہید اہلکاروں کے ایصالِ ثواب اور لواحقین کے لیے صبر کی دعا بھی کی۔